ԵՐԵՎԱՆ, 29 փետրվարի – Sputnik. «Արծաթե թիթեռնիկների» փոխարեն` մոխրի անձրև. երեկ Երևանի տարբեր հատվածներում օդում պարում էին մոխրի ժապավենանման կտորները։ Երեկոյան` մոտավորապես 21։00-ին, Ամիրյան 4/7 հասցեում գտնվող Sputnik Արմենիայի խմբագրության հարակից տարածքը նույնպես ծածկվեց մոխրի մեծ ու փոքր կտորներով։ Ու մինչ խմբագրության աշխատակիցները փորձում էին հասկանալ` ինչը կարող է տարօրինակ «անձրևի» պատճառ լինել, պարզվեց, որ նման փաթիլներ են հայտնվել ոչ միայն Sputnik–ի խմբագրության հարևանությամբ, այլև քաղաքի տարբեր հատվածներում, ականատեսների խոսքով` Շահումյան հրապարակում, Սուրբ Սարգիս եկեղեցու մոտակայքում և այլուր։
Անհանգստացած, թե այս ինչ «մոխրե հարձակում» է մեր մայրաքաղաքի վրա կամ էլ անոմալ երևույթ` կապ հաստատեցինք ԱԻՆ «911» ծառայության հետ։
«Անհանգստանալու ոչինչ չկա, եղեգներ են այրվել»,– Sputnik Արմենիայի թղթակցի հետ զրույցում նշեց ԱԻՆ աշխատակիցը։
Պարզվում է, որ երկնքից թափվող մոխիրները քամին է տարածել քաղաքով մեկ Հրազդանի կիրճում բռնկված խոշոր հրդեհից հետո։ Այրվել է գրեթե 4000 քառ. մետր խոտածածկ տարածք։
Այս պահին ԱԻՆ աշխատակիցները նշված տարածքում ջրման աշխատանքներ են կատարում, որպեսզի մոխիրն այլևս չտարածվի քաղաքով մեկ։
Հայաստանում ճանապարհներ կան, որոնք անորոշ ժամանակով փակ կլինեն