Պապիկյանն աղմկահարույց «Այո՛»–ի գումարի հավաստագրերը հանձնեց նկարի «իրական տերերին»

ԵՐԵՎԱՆ, 28 փետրվարի — Sputnik. ՀՀ տարածքային կառավարման և ենթակառուցվածքների նախարար, «Այո»–ի շտաբի պետ Սուրեն Պապիկյանն այսօր 1 մլն դրամի հավաստագրեր հանձնեց «Երեկոյան Երևանի» խմբագիր Նորիկ Ենգիբարյանին, նկարիչ Ցոլակ Ղանդիլյանին և «Այո»–ի նկարի հեղինակի դստերը` Սյուզաննա Նարոյանին։

«Արդարությունը վերականգնելու համար մենք պետք է նախատեսված 3 մլն դրամը բաշխենք «Երեկոյան Երևան» թերթի երկու նկարիչների և թերթի խմբագրի միջև»,–ասաց Պապիկյանը։

Նշենք, որ սեպտեմբերի 25-ին ներկայացվեց սահմանադրական հանրաքվեի «Այո» քարոզչական կողմի տարբերանշանը, որը, պարզվեց, նոր չէ։ 1991-ի «Երեկոյան Երևան» օրաթերթում արդեն իսկ տպագրվել էր մի հոդված` այդ նույն «Այո»–ի պատկերով։ Sputnik Արմենիան ավելի վաղ պարզել էր, որ 1991–ի Անկախության հանրաքվեի «Այո»–ի` արդեն իսկ հայտնի նկարի հեղինակը լուսահոգի Ստյոպա Նարոյանն է (նկարը հրապարակվել է «Երեկոյան Երևան» օրաթերթի սեպտեմբերի 23-ի համարում)։

Սեպտեմբերի 26-ին Պապիկյանը Fasebook–յան ուղիղ եթերում հայտարարեց, որ «Այո»–ի շտաբի քարոզարշավի համար ընտրված տարբերանշանը չի փոխվի, սակայն այն երեք միլիոն դրամը, որ նախատեսված էր առաջին տեղի համար, կբաշխեն երեք տեղ։

«Այո» տարբերանշանի ստեղծողները տեղյակ են եղել հնի գոյության մասին. հայտարարություն