ԵՐԵՎԱՆ, 28 փետրվարի — Sputnik. Հակառակորդն այսօր կրակ է բացել Տավուշի մարզի Կոթի գյուղի վրա։ Լուրը Sputnik Արմենիայի հետ զրույցում հաստատեց Կոթի համայնքի վարչական ղեկավար Ֆելիքս Մելիքյանը։
Նրա խոսքով՝ կրակոցները եղել են կեսօրին մոտ, մոտավորապես 12–ի-13-ի հատվածում։ «Մոտ կես ժամ ակտիվ կրակում էին, իսկ հետո շարունակեցին հատուկենտ` մոտ մեկ ժամ։ Եղել է և՛ գյուղի, և՛ դիրքերի ուղղությամբ»։
Մելիքյանի խոսքով՝ տուժածներ և գույքային վնաս կրողներ չկան. «Վնասների մասին այս պահին ինձ գոնե ոչ մի տեղեկություն չեն հայտնել, մարդկային կորուստներ չունենք»,–ասաց նա։
Ադրբեջանը 1100 կրակոց է արձակել հայ դիրքապահների ուղղությամբ
Իր հերթին ՀՀ ՊՆ մամուլի խոսնակ Արծրուն Հովհաննիսյանը Sputnik Արմենիայի հետ զրույցում ասաց, որ այսօր, ժամը 12:30-ի սահմաններում գյուղի և դիրքերի ուղղությամբ արձակվել է 25 կրակոց: