ԵՐԵՎԱՆ, 27 փետրվարի — Sputnik. IRNA գործակալությունը հայտնում է, որ Իրանի նախագահի՝ կանանց ու ընտանիքի հարցերով փոխնախագահ Մասումե Էբտեկարը վարակվել է կորոնավիրուսով։
«Հաշվի առնելով տիկին Էբտեկարի մոտ առկա ախտանիշները` կորոնավիրուսի թեստ է անցկացվել, և այն դրական է եղել», – հայտնել է փոխնախագահի օգնականը։
Ավելի վաղ` փետրվարի 25–ին, հայտնի էր դարձել, որ Իրանի առողջապահության փոխնախարար Իրաջ Հարիրչին է վարակվել կորոնավիրուսով։ «Առողջապահության նախարարության ղեկավարի տեղակալ դոկտոր Հարիրչիի կորոնավիրուսի թեստի պատասխանը դրական է եղել։ Վերջին օրերին նա կորոնավիրուսի դեմ պայքարի առաջնագծում էր», - Twitter-ում գրել էր Իրանի առողջապահության նախարարի խորհրդական Ալի Ռեզա Վահաբզադեն:
Դրա նախորդ օրը տեղի էր ունեցել Հարիրչիի մամուլի ասուլիսը։ ՌԻԱ Նովոստիի թղթակիցը հետևել էր ասուլիսին և նկատել, որ նախարարի տեղակալը ընթացքում մի քանի անգամ հազացել էր:
Կորոնավիրուսի պատճառով ՊՆ–ն արգելել է զորամասերում այցելություններն ու արձակուրդները
Այսօրվա տվյալներով` Իրանում կորոնավիրուսով վարակվածների թիվն արդեն հասել է 245-ի, մահացածների թիվը` 26–ի։ Ըստ օրվա ցուցանիշների` վարակման ամենաշատ դեպքերը գրանցվել են Թեհրանում` 38 դեպք։ Հաջորդը Գիլան նահանգն է` 23 դեպք, հետո Ղոմը, որտեղից էլ սկսվել էր կորոնավիրուսի տարածումը։
Այսօր վարակվածների թվի ամենակտրուկ աճն է գրանցվել` ավելի քան 100 մարդ։
Հիշեցնենք, որ փետրվարի 26-ի տվյալներով` Իրանում գրանցվել էր վարակման 139 և մահվան 19 դեպք:
Իրանի իշխանությունը որոշել է մինչև մարտի 6–ը չեղարկել մշակութային միջոցառումները։ Ուսումնական հաստատությունները ևս անորոշ ժամանակով փակ կլինեն։
Իրանում կորոնավիրուսի տարածման պատճառով Հայաստանի կառավարությունը փետրվարի 24-ից երկու շաբաթով փակել է հարևան երկրի հետ ցամաքային սահմանը։ Մասնակի սահմանափակվել են նաև ՀՀ–ից դեպի Իրան օդային փոխադրումները։ Սակայն Հայաստան ժամանակ Իրանի բոլոր քաղաքացիները կարող են տուն վերադառնալ, Իրանում գտնվող ՀՀ քաղաքացիներն էլ կարող են առանց սահմանափակումների Հայաստան վերադառնալ։
Կորոնավիրուսը հասավ Վրաստան. մեր հարևան երկրում վարակի առաջին դեպքն է հաստատվել