ԵՐԵՎԱՆ, 26 փետրվարի — Sputnik. Հայաստանը շարունակում է լիովին հավատարիմ մնալ Ղարաբաղյան հակամարտության խաղաղ կարգավորմանը՝ ԵԱՀԿ Մինսկի խմբի համանախագահության միջազգայնորեն ճանաչված մանդատի ձևաչափի շրջանակներում և ընդգծում է Արցախի անվտանգության և կարգավիճակի գերակայությունը: Այս հայտարարությամբ ՀՀ ԱԳ նախարար Զոհրաբ Մնացականյանը հանդս է եկել ՄԱԿ-ի Մարդու իրավունքների խորհրդի 43-րդ նիստում։
«Արցախի ժողովուրդն իրավունք ունի առանց որևէ սահմանափակման ազատորեն որոշելու իր քաղաքական կարգավիճակը, ազատորեն հետամուտ լինելու իր տնտեսական, սոցիալական և մշակութային զարգացմանը՝ ինքնորոշման իրավունքի հիման վրա: Սա է խաղաղ կարգավորման առանցքը»,– իր ելույթում ասել է Մնացականյանը: Նա նշել է, որ Հայաստանը նաև ընդգծում է ատելությունը և անհանդուրժողականությունը բացառելու և մարդկանց միջև շփումներ խթանելուն ուղղված լուրջ ջանքեր ներդնելու կարևորությունը, հավասարապես, խստորեն բացառվում է ուժի սպառնալիքը: Հայաստանն ու Արցախը հանձնառու են աշխատելու 2019թ.-ին գրանցած համեստ արդյունքների վրա։
Էսկալացիան խանգարում է բանակցային գործընթացին. Մնացականյանը` սահմանի լարվածության մասին
«Արցախի ժողովուրդը շարունակում է դիմակայել Ադրբեջանի կողմից ուժի և հարկադրանքի կիրառման սպառնալիքին: Ադրբեջանի կողմից մարդու իրավունքների հետևողական խոչընդոտումը, Արցախի ժողովրդի նկատմամբ անհանդուրժողականությունը, ատելությունը, խտրականությունը և բացահայտ ագրեսիան հակամարտության սկզբնապատճառն են:
Արցախի ՊԲ նոր հրամանատարին թույլատրվել է կոշտ միջոցներ ձեռնարկել. քաղտեխնոլոգ
Բաքվում, Սումգայիթում, Կիրովաբադում և Ադրբեջանի այլ քաղաքներում ու գյուղերում հայկական փոքրամասնության հանդեպ սանձազերծված ջարդերը, էթնիկ զտումները և բռնագաղթը, 1990-ականներին Լեռնային Ղարաբաղի դեմ պատերազմն ու ագրեսիան, հային սպանելու համար դատապարտված մարդասպանների հերոսացումը վկայում են Ադրբեջանի հետևողական ագրեսիվ քաղաքականության մասին: Դրանք գոյապահպանական ֆիզիկական անվտանգության սպառնալիք են Արցախի ժողովրդի համար: Այս սպառնալիքի մասին մեզ հիշեցվել է Լեռնային Ղարաբաղի դեմ 2016թ. ապրիլին վերսկսված ագրեսիայի փորձով»,– ասել է Մնացականյանը:
ԱԳ նախարարը հայտնել է, որ մարտի 31-ին Արցախի ժողովուրդը նախագահ ու խորհրդարան է ընտրելու՝ իրացնելով իր՝ ժողովրդավարական ձևով կյանքը կազմակերպելու իրավունքը: