ԵՐԵՎԱՆ, 24 փետրվարի — Sputnik. Իրանում կորոնավիրուսի տարածման պատճառով Հայաստանի դեսպանություն է դիմել ՀՀ 35 քաղաքացի, այդ թվում նաև երկքաղաքացիներ։ ՀՀ արտաքին գործերի նախարարության մամուլի խոսնակ Աննա Նաղդալյանը Sputnik Արմենիայի հետ զրույցում ասաց, որ դեսպանությունը անում է հնարավորը, որպեսզի ՀՀ քաղաքացիների բարձրացրած հարցերին անհրաժեշտ լուծումներ տրվեն:
«ԻԻՀ-ում ՀՀ դեսպանություն է դիմել ՀՀ 35 քաղաքացի, այդ թվում նաև երկքաղաքացիներ։ Դեսպանությունը մշտական կապի մեջ է ՀՀ քաղաքացիների հետ և ձեռնարկում է բոլոր անհրաժեշտ քայլերը ՀՀ քաղաքացիների կողմից բարձրացվող հարցերի արագ հասցեագրման ուղղությամբ»,-նշեց Նաղդալյանը:
Վերջին տվյալների համաձայն՝ Իրանում արդեն գրանցվել է կորոնավիրուսով վարակման 47 դեպք։ Զոհերի թիվը հասել է 12–ի։
Իրանում ՀՀ դեսպանության հյուպատոսական բաժինը փետրվարի 23–ից ժամանակավորապես դադարեցրել է աշխատանքը՝ քաղաքացիների մուտքն ու ընդունելությունը:
ՀՀ վարչապետ Նիկոլ Փաշինյանը հայտարարել է, որ 2 շաբաթով կդադարեցվի Իրան-Հայաստան օդային հաղորդակցությունն ու Մեղրիի սահմանային անցակետով անձանց մուտքը Հայաստան։
Իրանում նոր կորոնավիրուսով վարակման դեպքերի թիվը հասել Է 47-ի, գրանցվել Է 12 մահ: Կորոնավիրուսից մահվան դեպքեր են գրանցվել Ղոմ, Մարքազի և Մազանդարան նահանգներում: