Ռոբերտ Հայրապետյանը ևս մեկ անգամ կրկնում է այն թեզը, որ «Ոչ»-ի քարոզը չի լինելու ընտրական օրենսդրության իմաստով ընկալվող դասական քարոզ, այսինքն` չի լինելու քաղաքական քարոզ այն պարզ պատճառով, որ «Ոչ»-ի թիմը բաղկացած է բացառապես իրավաբաններից, և թիմի ստեղծման հիմնական նպատակը վերահսկողական մեխանիզմներից օգտվելն է։
«Եթե մեր նախաձեռնությունը չլիներ, ապա ընտրական հանձնաժողովներում չէինք ունենա անդամներ, իսկ ընտրական տեղամասերում չէինք ունենա վստահված անձինք, ինչն էլ մեզ հնարավորություն չէր տա վերահսկողություն սահմանել այն գործընթացների կամ խախտումների նկատմամբ, որոնք կարող են լինել հանրաքվեի կազմակերպման պրոցեսում»,– նշում է իրավաբանը։
Ռոբերտ Հայրապետյանի փոխանցմամբ` իրենց նպատակը հասարակությանը նաև ապրիլի 5-ին տեղի ունենալիք քվեարկության ընթացքի մասին իրազեկելն է։ «Ոչ»-ի նախաձեռնող խումբն, ըստ Հայրապետյանի, օգտվելու է հասանելիք հանրային միջոցներից, հանրային հեռուստաընկերությամբ հանրաքվեի մասին սահմանադրական օրենքով հաստատված մեկ րոպե անվճար եթերից կամ էլեկտրոնային մեդիայի հնարավորություններից, որպեսզի հասարակությանն իրազեկեն հանրաքվեի հակասահմանադրականության և այն վտանգների մասին, որոնք արդեն իսկ նշմարվում են և կարող են խորանալ ու դառնալ լուրջ սպառնալիք ՀՀ–ի ու նրա քաղաքացիների համար։
««Այո»-ի կողմը հակասահմանադրական քայլերով ու գործողություններով, որոնք իրականացնում է, թաքնվում է ժողովրդի հավաքական կերպարի կամ եզրույթի ներքո կամ քողարկվում է դրանով»,– նշում է իրավաբանը։
Ռոբերտ Հայրապետյանի դիտարկմամբ` իշխանությունը ժողովրդավարության հաշվին այժմ իր քայլերով փորձում է պարպել պետության իրավական լինելը։
Վենետիկի հանձնաժողովը պետք է պատասխանի որոշ հարցերի. Նիկոլ Փաշինյան
Հիշեցնենք` ՀՀ ԱԺ-ն փետրվարի 6-ին արտահերթ նիստում ընդունեց Սահմանադրական փոփոխությունների նախագիծը հանրաքվեի դնելու որոշումը։ Նախագծով առաջարկվում է 2015 թվականի դեկտեմբերի 6-ին փոփոխված Սահմանադրության 213-րդ հոդվածը շարադրել նոր խմբագրությամբ և ներկայացնել այսպես. «Մինչև Սահմանադրության 7-րդ գլխի ուժի մեջ մտնելը նշանակված ՍԴ նախագահի և անդամների պաշտոնավարումը դադարում է»:
Սահմանադրության 7-րդ գլուխն ուժի մեջ է մտել 2018-ի ապրիլի 9-ին։ Դրանից հետո ՍԴ դատավոր են ընտրվել միայն Արմեն Դիլանյանն ու Վահե Գրիգորյանը: ՍԴ մնացած 7 անդամները, այդ թվում ՍԴ նախագահ Հրայր Թովմասյանն ընտրվել են մինչև 2018թ-ի ապրիլի 9-ը:
Հանրաքվեն նշանակված է ապրիլի 5–ին։ Քարոզարշավը կավարտվի ապրիլի 3-ի ժամը 24։00–ին։