Կարեն Իսրայելյանի խոսքով անհանգստացնող է այն, որ «Նաիրիտ» գործարանի սնանկության կառավարիչը գործարանի պարտատերերի համաձայնությամբ դիմել է դատարան` նախկին աշխատակիցների չստացած տոկոսների վերադարձման հայցով։
«Եթե հիշում եք, 2015թ–ին գործարանի աշխատակիցներն անհատապես իրենց իրավունքներն ամբողջությամբ զիջել էին «Նաիրիտ–2-ին»։ Այսինքն` նրանք օրենքի սահմաններում իրավունք չունեն գործարանից իրենց աշխատավարձը կամ աշխատավարձից բխող տույժ–տուգանքները պահանջել»,– ասաց նա։
Իսրայելյանի գնահատմամբ` սա նշանակում է, որ «Նաիրիտ» գործարանի պարտքը կավելանա շուրջ 3-4 մլրդ դրամով, ինչը նոր հոգս է գործարանի համար և ավելի կդժվարացնի վերաթողարկման հարցով հետագա բանակցությունները։
«Նաիրիտը» կարող է վաճառվել Իրանին. կառավարությունը քննարկում է առաջարկը
«Կան ներդնողներ, որոնց հետ կառավարությունը բանակցում է։ Նրանցից մեկն, օրինակ, «Թավրիզ պետրոլիում» ընկերությունն է։ Շահագրգռված ընկերություններ ևս կան, որոնք ցանկանում են մասնակցել ներդրումային ծրագրերին, բայց նրանց պարագայում սպասում ենք կառավարության դիրքորոշմանը, որը մեզ հետ հանդիպման ժամանակ որոշել էր տեսակետ ներկայացնել, թե ինչ պայմաններով է գործարանն առաջարկելու ներդրողներին։ Բանակցություններն ավարտական փուլում են, 10 օրից պարզ կլինի, թե ինչ պայմաններով «Նաիրիտը» կտրվի ներդրողներին»,– նշեց նախկին տնօրենը։
Մարտի վերջին կպատասխանեն. իրանցի ներդրողներն ուզում են աշխատել «Նաիրիտում»
Նրա համոզմամբ` գործարանի վերաթողարկման համար անհրաժեշտ է 120մլն դոլար։ Այդ դեպքում գործարանը մեկուկես տարի անց տարեկան կաշխատի 25000 տոննա հզորությամբ, կարտադրի 100 մլն դոլարի ապրանք, որն ամբողջությամբ կարող է արտահանվել, ինչն իր հերթին կբերի տարեկան 20մլն դոլարի եկամուտ։
2006թ.-ին կառավարությունը «Նաիրիտի»-ի 90 տոկոս բաժնեմասը վաճառեց Rhinoville Property Limited օֆշորային ընկերությանը, որը պարտավորվել էր մինչև 2012 թվականը 120 մլն դոլարի ներդրում կատարել: Ներդրումներ չկատարվեցին, իսկ գործարանը 2010 թ.-ից պարապուրդի մատնվեց` էլեկտրաէներգիայի համար կուտակած 1 միլիարդ դրամի պարտքի պատճառով: 2007 թվականից գործարանը վարկային պարտավորություն ունի նաև ԱՊՀ միջպետական բանկի նկատմամբ։
Այս վարկը չվերադարձնելու պատճառով գործարանը սնանկ ճանաչվեց։ Ընկերությունն իր 90 % բաժնետոմսերն անհատույց կերպով վերադարձրեց ՀՀ կառավարությանը:
Արդեն 5 տարի` 2015թ.–ից ՀՀ նախկին ու ներկա կառավարությունները «Նաիրիտի« համար գնորդներ ու ներդրողներ են փնտրում։ Այդ տարիների ընթացքում գործարանի հնարավորություններն ուսումնասիրել են ռուսական «Ռոսնեֆտն» ու իտալական Pirelli-ին, բայց անարդյունք։