ԵՐԵՎԱՆ, 19 փետրվարի – Sputnik. ՀՀ վարչապետ Նիկոլ Փաշինյանը Facebook–ի ուղիղ եթերում հայտնեց, որ այսօրվա դրությամբ 311 վարորդ զրկվել է վարորդական իրավունքից, բայց նրանցից ոչ մեկի դեպքում բալային համակարգ չի կիրառվել։
«Վարորդական իրավունքից զրկվել են միայն նրանք, ովքեր կոպտագույն խախտումներ են արել»,– ասաց նա։
Վարչապետը մանրամասնեց` 27-ը վարորդական իրավունքից զրկվել են մեքենան առանց պետհամարանիշի վարելու, 16–ը` կրկնակի ոչ սթափ վարելու համար, 6–ը հրաժարվել են սթափության ստուգում անցնել, 180 հոգու դեպքում խմածությունը 0.5 միլիգրամից շատ է եղել, 2 հոգի վարորդական իրավունքից զրկվել են չենթարկվելու և փախուստի համար, 3-ը` հատուկ ձայնային ազդանշան` փարոսիկ տեղադրելու համար։
«Էս մի քանիսը, կներեք արտահայտությանս համար, օլիգարխիական զամաշկեք են»,– ասաց նա։
Վարչապետի խոսքով` 77 հոգի էլ ոչ միայն զրկվել են վարորդական իրավունքից, այլև նրանց հետ կապված նյութեր են պատրաստվել, ուղարկվել նախաքննական մարմին` քրեական գործով նախաքննություն անցնելու համար։
«Այս մարդիկ ինչու՞ են զրկվել վարորդական իրավունքից։ Նրանց մի մասը` վարորդական իրավունքից զրկված վիճակում մեքենա վարելու համար, մյուս մասը, որ հա՛մ վարորդական իրավունք չի ունեցել, հա՛մ խմած է վարել։ Իմ կարծիքով` այս դեպքերը արդարացի են, որովհետև սրանք հանրային անվտանգությունը հարվածի տակ դրված գործողություններ են», – ասաց նա։
Փաշինյանը հայտնեց, որ այս տարվա փետրվարի 18-ի դրությամբ ավտովթարների զոհ դարձածների թիվը 2-ով պակաս է, քան նախորդ տարի։ Այն դեպքում, որ անցյալ տարի մեր երկրում 150 հազարով ավելացել է մեքենաների թիվը։
Վարչապետը ևս մեկ անգամ նշեց, որ նշված անձինք բալային համակարգի պատճառով չեն զրկվել վարորդական իրավունքից։
«Ըստ ամենայնի` այդ համակարգով առաջին զրկումները կլինեն մարտի վերջին, ապրիլի սկզբին։ Երբ դրանք արձանագրվեն, մենք խորը վերլուծություն կանենք հասկանալու համար` որքանով է համակարգն արդարացի, կմտածենք այդ համակարգի կատարելագործման ուղղությամբ»,– ասաց նա։
Փաշինյանը հուսով է, որ բալային համակարգը կօգնի ավելի օրինապահ դարձնել մարդկանց։
Հիշեցնենք, որ 2020 թվականի հունվարի 1-ից Հայաստանում ուժի մեջ է մտել տուգանային միավորների նոր համակարգը։ Տեսասարքերով արձանագրված խախտումների համար այն գործում է հունվարի 1-ից, ՃՈ տեսուչների արձանագրած խախտումների համար` 2020 թ-ի սեպտեմբերի 1-ից։ Նշենք, որ վարորդներից շատերը դժգոհ են այս համակարգից: Բողոքողները հիմնականում տաքսու վարորդներն են:
Անսահման ծիծաղ. Facebook-ի օգտատերերն անդրադարձել են տուգանքների բալային համակարգին