ԵՐԵՎԱՆ, 19 փետրվարի – Sputnik.Հայաստանում առաջիկա տարիներին ներդրումային բում չի լինի, մեր երկիրը պատրաստ չէ լուրջ ներդրումների. Sputnik Արմենիա մուլտիմեդիոն մամուլի կենտրոնում կայացած ասուլիսի ժամանակ նման կարծիք հայտնեց ՀՀ Կենտրոնական բանկի նախկին նախագահ, տնտեսագետ Բագրատ Ասատրյանը:
«Թյուր ոգևորություն է ներդրումների հետ կապված ակնկալիքները: Հայաստանի զարգացման վերջին տասնամյակն այնպիսին էր, որ ներդրումների նվազում էր լինելու: Այս խնդիրն այսօր էլ լուծված չէ, և միջավայրն այնպիսին չէ, որ մեծ քանակով ներդրումներ լինեն: Մենք պատրաստ չենք դրան»,-ասաց Ասատրյանը:
Նրա խոսքով՝ Հայաստանում մեծ թվով ներդրումներ ունենալու համար ինստիտուցիոնալ փոփոխություններ են պետք:
Ասատրյանը նշեց՝ իշխանությունը պետք է իր վրա պատասխանատվություն վերցնի, օրինակ՝ առանձին ծրագրեր մշակի ու դրանք միջազգային հանրությանը ներկայացնի, դատական համակարգը զարգացնի և այլն:
«Նաիրիտը» կարող է վաճառվել Իրանին. կառավարությունը քննարկում է առաջարկը
Ըստ նրա՝ մեր օրենքները վատը չեն, սակայն դրանք իրագործելու ճանապարհին կան մի շարք խնդիրներ: Ասատրյանի կարծիքով` որ 1-2 ներդրումներ, իհարկե, կլինեն, սակայն դրանք ոչինչ չեն փոխի:
ԿԲ նախկին նախագահը վստահ է՝ մինչև 2023-ը ներդրումային բում չի լինելու:
Հիշեցնենք, որ հեղափոխությունից հետո ՀՀ վարչապետ Նիկոլ Փաշինյանը քանիցս հայտարարել է, որ Հայաստանում ներդրումային բում է սպասվում: Օրինակ, դեռ նախորդ տարեսկզբին տնտեսական հեղափոխության հայեցակարգը կառավարությունում ներկայացնելիս Փաշինյանն ասել էր, որ ձեռքի տակ կան բազմաթիվ ներդրումային ծրագրեր: Ավելին, 2019-ի հոկտեմբերին էլ Փաշինյանը հայտարարել էր, թե Հանրապետությունում տնտեսական հեղափոխությունը թափ է հավաքում, այն իրողություն է, և այդ հեղափոխությունը կարելի է տեսնել արդեն նաև անզեն աչքով։ Ըստ Փաշինյանի, ՀՀ-ում հսկայական ներդրումներ են կատարվում: