ԵՐԵՎԱՆ, 17 փետրվարի — Sputnik. Սփյուռքի գործերի գլխավոր հանձնակատար Զարեհ Սինանյանը Sputnik Արմենիայի թղթակցի հետ զրույցում ասում է, որ սփյուռքի ու Հայաստանի հայերը փոխկապակցված են, իսկ ուժեղ հայրենիքն ավելի գրավիչ կլինի հայրենադարձների համար։
Սինանյանը հիշեցրեց, որ սիրիական ճգնաժամի տարիներին մոտ 22 հազար սիրիահայ Հայաստան էին վերադարձել։ Սակայն նրանց մոտ կեսը Կանադա ու ԱՄՆ է մեկնել, քանի որ ինտեգրման հետ կապված լուրջ խնդիրներ են առաջացել։ Պետությունը պատրաստ չէր նրանց ընդունելու, աշխատանքի, կրթության և այլ կենցաղային հարցերի հետ կապված խնդիրներ էին առաջացել։
«Մենք պետք է սովորենք անցյալի սխալներից։ Նախ` պետք է լուծենք առկա խնդիրները, տնտեսապես կայանանք, առողջապահության ու կրթության այնպիսի համակարգ ձևավորենք, որ պատրաստ լինենք ցանկացած պահի հայրենադարձների ընդունել», – ընդգծեց Սինանյանը։
Նա նշեց, որ Ավստրալիայում, Արգենտինայում, Լիբանանում, ԱՄՆ–ում, Ռուսաստանում, Սինգապուրում ու Չինաստանում ակտիվ հայ համայնքներ կան։ Պատերազմական խնդիրների պատճառով Սիրիայի ու Իրաքի հայերի թիվը զգալիորեն կրճատվել է, փոխարենը հայերը շատացել են ԱՄՆ–ում։ Բացի այդ, արդեն հայրենադարձության ալիք է նկատվում ԱՄՆ–ից ու Ռուսաստանից, սակայն ամենաշատը հայերը գալիս են Լիբանանից։ Ընդ որում` նրանք սոցիալապես կայացած մարդիկի են, որոնք ուզում են հայրենիքում զարգացնել իրենց բիզնեսը։ Սինանյանը նշեց նաև, որ Չինաստանում էլ ուժեղ ու ակտիվ հայկական համայնք կա, որը ներգրավված է տեղեկատվական տեխնոլոգիաների ոլորտում ու մշտապես կապի մեջ է Հայաստանի հետ։
Զարեհ Սինանյանը գիտի` ինչ է պետք անել, որ սփյուռքահայերը գան Հայաստան ու էլ չգնան
Սինանյանն ընդգծեց, որ բոլոր համայնքներին միավորում է ազգային ինքնության ու լեզվի պահպանման հարցը։ Այդ խնդրի լուծման համար նրա գրասենյակն աջակցում է սփյուռքում գործող հայկական դպրոցներին` անհրաժեշտ դասագրքեր ու գրականություն է տրամադրում, հասարակական կազմակերպություններին է օգնում, նաև տարբեր մասնագիտության տեր մարդկանց համար սեմինարներ է կազմակերպում։
«Աշխարհասփյուռ հայությանը միավորում է նաև Հայոց ցեղասպանության ճանաչման հարցը։ Այն կարևոր է ոչ միայն պատմական արդարությունը վերականգնելու տեսակետից, այլև ազգային անվտանգության։ Քարի որ հանցանքը հերքողը կարող է կրկնել իր արարքը», – ասաց նա։
Հանձնակատարը նշում է, որ Թուրքիան շատ է խոչընդոտում Հայոց ցեղասպանության ճանաչմանը։ Նրա խոսքով` երկրներից շատերը ճանաչում են Ցեղասպանությունը Թուրքիայի հետ հարաբերությունների վատթարացումից հետո։ Այդ համատեքստում նա կարևորեց ու խորհրդանշական համարեց Սիրիայի կողմից Ցեղասպանության ճանաչումը, քանի որ այդ երկրում հաստատվել են Ցեղասպանությունից մազապուրծ եղած բազմաթիվ հայերի սերունդները։
Ապրիյան. «Սփյուռքահայերը հետաքրքրություն են դրսևորում Հայաստանի անշարժ գույքի շուկայում»
Նշենք, որ Սիրիայի խորհրդարանը փետրվարի 13–ին միաձայն ընդունեց Հայոց ցեղասպանությունը ճանաչող և դատապարտող բանաձև։ 20-րդ դարում Օսմանյան կայսրության կողմից Հայոց ցեղասպանության և Սիրիայի ժողովրդի այլ ներկայացուցիչների ցեղասպանության ճանաչումն ու դատապարտումը հաստատող բանաձևը ներկայացրել էր Սիրիա-Հայաստան խորհրդարանական բարեկամության հանձնախումբը։