ԵՐԵՎԱՆ, 17 փետրվարի — Sputnik. ՀՀ կրթության, գիտության, մշակույթի և սպորտի նախարար Արայիկ Հարությունյանը Facebook–ի իր էջում լավ լուր է հայտնել հիվանդության պատճառով այս օրերին դպրոցից բացակայած աշակերտների համար։
«Հունվարի 8-ից մինչև փետրվարի 15-ի բացակայությունները կհամարվեն հարգելի և կզրոյացվեն մեխանիկորեն, իսկ փետրվարի 17-ից մարտի 10-ն ընկած ժամանակահատվածում բացակայությունները կհամարվեն հարգելի բժշկական տեղեկանքի առկայության պայմաններում»,- գրել է նա և հավելել, որ այս ընթացքում մշտապես կապի մեջ է եղել Առողջապահության նախարար Արսեն Թորոսյանի հետ, և դասերը դադարեցնելու առիթ և պատճառ չեն տեսել։ Հիմա, ըստ նախախարի, վիրուսների տարածման առումով որոշակի կայունացում կա։
Մեկնաբանելով բացակայությունները հարգելի դարձնելու իրենց քայլը` Հարությունյանը նշել է, որ ավելի քան 120 ժամ բացակայելու դեպքում աշակերտը պետք է վերաքննություն հանձնի։ Վախենալով կամ չցանկանալով վերաքննություն հանձնել` շատ աշակերտներ, ըստ նախարարի, հիվանդ վիճակով գալիս էին դպրոց և վարակում մյուսներին։
18 մեդալ` մեկ միջազգային օլիմպիադայից. հայ աշակերտներն Ալմաթիից հաղթանակով են վերադարձել
«Առողջապահության նախարարի հետ պայմանավորվել ենք, որ խիստ կհետևեն, որ կեղծ բժշկական տեղեկանքներ չտրվեն»,–ասաց նա։
Նախարարը նաև ուսումնական հաստատություններին հորդորեց հնարավորություն ստեղծել, որ աշակերտները լրացնեն բաց թողած դասերը։
Նշենք, որ փետրվարի 7–ին ՀՀ առողջապահության նախարար Արսեն Թորոսյանն ասել էր, որ երկրում այս պահին կա սեզոնին բնորոշ սուր-շնչական վարակներով հիվանդացություն, որոնց մի մասը պայմանավորված է գրիպի վիրուսի տարբեր ենթատեսակներով։ Համաճարակի մասին լուրերը նա հերթական անտեղի խուճապ էր որակել և նշել, որ ցանկացած պոլիկլինիկայում կարելի է պատվաստվել գրիպի դեմ։
Չնայած դրան, սուր շնչառական հիվանդություններով վարակվածները քիչ չէին։ Նրանց թվում շատ էին նաև երեխաները։ Մանկավարժների և ծնողների հավաստմամբ` այս օրերին դպրոցներում և մանկապարտեզներում բացակայող երեխաների թիվը մեծ է եղել։