ԵՐԵՎԱՆ, 11 փետրվարի — Sputnik. Սահմանադրական փոփոխությունների հանրաքվեն իշխող քաղաքական ուժի վստահության հանրաքվեն չէ։ Այսօր ԱԺ–ում լրագրողների հետ զրույցում ասաց ԱԺ փոխնախագահ Ալեն Սիմոնյանը` հերքելով շրջանառության մեջ դրված այն տեսակետը, թե հանրաքվեի մասնակցության ակտիվությամբ ու նախագծի ստացած ձայներով կբացահայտվի նաև իշխող քաղաքական ուժի հանդեպ ժողովրդի վստահությունը։
«Խի մենք վստահության խնդիր ունե՞նք։ Խի ընտրություններն ինչ–որ մեկի մոտ կասկա՞ծ են առաջացրել»,– ասաց Սիմոնյանը` հավելելով, որ հանրաքվեն միայն այն հարցն է լուծում, որի նպատակով անցկացվում է։
Այդ հեղափոխությունը որևէ մեկի անձնականը չէ։ Այդ հեղափոխությունը ՀՀ ժողովրդինն է։ Եվ ՀՀ ժողովուրդը պետք է գնա այդ հեղափոխությանը նաև վերջակետը դնի»,– ասաց նա։
Սիմոնյանը հիշեցրեց, որ նոր կառավարության 100 օրվան նվիրված հանրահավաքում ՀՀ վարչապետ Նիկոլ Փաշինյանը հայտարարել էր, որ Հայաստանում հաճախակի անցկացվելու են հանրաքվեներ, որտեղ ժողովուրդն ուղիղ որոշում է կայացնելու։ Ապրիլի 5-ին նախանշված հանրաքվեն, ըստ նրա, դրանցից մեկն է։
«Բարգավաճ Հայաստանը» դեռ չի որոշել` որ ճամբարում է լինելու` «այո»–ի, թե «ոչ»–ի
Ինչ վերաբերում է սահմանադրական փոփոխության ընդունվելու համար անհրաժեշտ ավելի քան 600 000 քաղաքացիների ձայներին, պատգամավորը վստահություն հայտնեց, որ «այո»–ն անհրաժեշտ նվազագույն ձայներից շատ ավելին է ստանալու։
Հիշեցնենք` հանրաքվեն կայացած ու Սահմանադրությունը փոխված կհամարվի, եթե դրան կողմ քվեարկեն հանրաքվեի մասնակիցների կեսից ավելին, բայց ոչ պակաս, քան հանրաքվեներին մասնակցելու իրավունք ունեցող քաղաքացիների մեկ քառորդը:
Քանի որ 2018թ–ի տվյալներով` ՀՀ–ում ընտրելու իրավունք է ունեցել 2 593 140 քաղաքացի, ապա այդ հաշվարկով սահմանադրական փոփոխություններն ընդունելու համար դրանց «այո» պիտի ասեն առնվազն 648 285 ՀՀ քաղաքացի։
Հիշեցնենք, որ ապրիլի 5–ին նախատեսված սահմանադրական փոփոխությունների նախագիծը հանրաքվեի դնելու քարոզարշավը կմեկնարկի փետրվարի 17-ին և կավարտվի ապրիլի 3-ին։
ՀՀ ԱԺ-ն փետրվարի 6-ին արտահերթ նիստում ընդունեց Սահմանադրական փոփոխությունների նախագիծը հանրաքվեի դնելու որոշումը։
Որքան արժե Թովմասյանի հրաժարականը. հանրաքվեի ծախսերը հաշվարկվում են
Նախագծով առաջարկվում է 2015 թվականի դեկտեմբերի 6-ին փոփոխված Սահմանադրության 213-րդ հոդվածը շարադրել նոր խմբագրությամբ և ներկայացնել այսպես. «Մինչև Սահմանադրության 7-րդ գլխի ուժի մեջ մտնելը նշանակված ՍԴ նախագահի և անդամների պաշտոնավարումը դադարում է»:
ՀՀ նախագահ Արմեն Սարգսյանը փետրվարի 9–ին ստորագրեց նախագիծը։ Հանրաքվեն կանցկացվի ապրիլի 5–ին։