ԵՐԵՎԱՆ, 10 փետրվարի – Sputnik. Ադրբեջանի «Նոր Ադրբեջան» իշխող կուսակցության փոխնախագահ, գլխավոր քարտուղար Ալի Ախմեդովն արդեն հայտարարել է, որ իրենց կուսակցությունը հաղթել է արտահերթ խորհրդարանական ընտրություններում։ Նա արդեն այդ կապակցությամբ շնորհավորել է ինչպես կուսակցության անդամներին, այնպես էլ հաղթած թեկնածուներին։
Նշենք, որ երեկ` փետրվարի 9–ին, Ադրբեջանում կայացան արտահերթ խորհրդարանական ընտրություններ. դրանց մասնակցել է ընտրողների 47,81%–ը։
Մինչ ընտրությունների ավարտը Ախմեդովն արդեն Facebook–ի իր էջում գրել էր, որ Էքզիթ փոլի արդյունքները ցույց են տվել, որ իրենց կուսակցությունը հաղթել է ընտրություններում։
«Կարող եմ շնորհավորել մեր կուսակցության անդամներին «Նոր Ադրբեջանի» հաղթանակի կապակցությամբ։ Շնորհավորում եմ հաղթած թեկնածուներին։ Շնորհակալ ենք մեր կուսակցությանը, թեկնածուներին ու մեր բոլոր ընտրողներին», – գրել է նա։
Ադրբեջանի ԿԸՀ–ն մշակել է 118 ընտրական տեղամասերի (ընդհանուր 125 տեղամաս է) 4823 ընտրատարածքների արձանագրությունները։
Ադրբեջանի ԿԸՀ–ի նախագահ Մազահիր Պանախովը ճեպազրույցի ընթացքում հայտնել է, որ ԿԸՀ–ն լրջորեն կուսումնասիրի քվեարկության ընթացքի վերաբերյալ տեղեկություններն ու տեսանյութերը, որոնք շրջանառվում են սոցցանցերում։
«Ադրբեջանը փորձում է իր քարոզչական մեսիջներով ազդել մեր հասարակության վրա». Էլիբեգովա
«Եթե որևէ մեկը որևէ փաստ ունի, պետք է անհապաղ ներկայացնի ԿԸՀ։ Խոստանում եմ, որ մեր պատասխան քայլերը շատ լուրջ են լինելու։ Ոչ ոք իրավունք չունի սևացնել Ադրբեջանի խորհրդարանական ընտրությունները», – նշել է Պախանովը։
Ընտրություններին մասնակցել է 1314 թեկնածու 20 կուսակցությունից։ Կային նաև ինքնաառաջադրված մասնակիցներ ու քաղաքացիների նախաձեռնությունների կողմից առաջադրված թեկնածուներ։ Ընդդիմադիրները հայտնում են գրանցված բազմաթիվ խախտումների մասին։