Ինչպես են տավուշցիները վերաբերվում սպանդանոցների գաղափարին. պարզաբանում է մարզպետը

Տավուշի մարզպետը վստահեցնում է, որ մինչև հուլիսի 1–ը, երբ կսկսի գործել մորթը սպանդանոցներում իրականացնելու օրենքը, մարզը պատրաստ կլինի դրան։
Sputnik

ԵՐԵՎԱՆ, 7 փետրվարի — Sputnik. Տավուշում, ընդհանուր առմամբ, համաձայն են սպանդանոցների գաղափարի հետ, այս պահին էլ իրականացվում են դրանց կառուցման աշխատանքները: Տեղեկությունը տարեկան ամփոփիչ ասուլիսի ժամանակ հայտնեց Տավուշի մարզպետ Հայկ Չոբանյանը։

Հիշեցնենք` կառավարության որոշմամբ` 2019թ. հուլիսի 1-ից հանրային սննդում, իսկ այս տարվա հունվարի 15-ից` սպառման բոլոր օղակներում թարմ միս պիտի մատակարարվի բացառապես սպանդանոցներից:

Տավուշում սկսել են անտառներն ավելի քիչ թալանել. ինչի հույս ունի մարզպետը

«Տավուշի մարզում սպանդանոցների հետ կապված բողոքի ակցիաներ չեն եղել։ Մեզ մոտ կողմ են գաղափարին, սակայն դեռ շատ անելիքներ ունենք։ Նոյեմբերյանում արդեն իսկ կառուցվել է սպանդանոց, իսկ Իջևանում` Ենոքավան գնացող ճանապարհին, մեկնարկել են սպանդանոցի կառուցման աշխատանքները. երկուսն էլ մասնավորի կողմից են կառուցվում»,–ասաց մարզպետը։

Չոբանյանի խոսքով` Տավուշում առանձնացրել են 14 ռեգիոնալ միավոր, այսինքն` առնվազն 14 սպանդանոց պետք է ունենան, որպեսզի գյուղացին մսի մթերումն իրականացնի առանց հավելյալ խոչընդոտների։

Մարզպետը նշեց, որ մինչև հուլիսի 1-ը, երբ սպանդանոցների հետ կապված օրենքն արդեն կգործի, մարզում դրանց առնչվող բոլոր խնդիրները լուծված կլինեն։

Քաղաքակրթությունն ու գյուղացու կորցրած շահույթը. սպանդանոցների չերևացող կողմը

Հիշեցնենք, որ կառավարության` մորթը պարտադիր սպանդանոցներում իրականացնելու որոշումից հետո ֆերմերները քանիցս բողոքի ակցիա իրականացրին։ Բողոքող ֆերմերները հայտարարում էին, որ սպանդանոցները մորթի դիմաց չափազանց մեծ գին են պահանջում, բացի այդ շատ տեղերում դրանք ընդհանրապես բացակայում են, և անասուն մորթելու համար ֆերմերը ստիպված է լինում տասնյակ կիլոմետրեր անցնել։

Ինչպես է աշխատում սպանդանոցը, երբ անասունի թեման դժգոհության ալիք է բարձրացնում. տեսանյութ