ԵՐԵՎԱՆ, 7 փետրվարի — Sputnik. Պետական եկամուտների կոմիտեի մաքսանենգության դեմ պայքարի վարչության աշխատակիցները Մեղրիի անցակետում Իրանի քաղաքացի Ս.Հ-ի ուղեբեռում հայտնաբերել են 900 գրամ «կետամին» տեսակի հոգեմետ նյութ` թաքցրած սուրճի փաթեթների մեջ:
Իրանցին հայտնել է, որ մենակ չի գործել, այլ իր համերկրացու` Մ.Մ.-ի հետ, որին հայտնաբերել են «Զվարթնոց» օդանավակայանի մեկնման սրահում։ Իրանցին պատրաստվում էր մեկնել Երևան-Դոհա-Կուալա Լումպուր ուղղությամբ: Նրա ուղեբեռի մաքսային զննմամբ ևս հայտնաբերվել է սուրճի 49 փաթեթ` «կետամինի» պարունակությամբ` 1 կգ 335 գրամ ընդհանուր քաշով։
Մաքսանենգության բացահայտված դեպքերով ՊԵԿ քննչական վարչությունում հարուցվել են քրեական գործեր, Իրանի քաղաքացիները ձերբակալվել են:
Ո՞ր երկրներից է թմրանյութ հասնում ՀՀ, կամ 1 կգ թմրանյութ` Երևանի գիշերային ակումբի համար
Նշենք, որ ՀՀ ՊԵԿ մաքսանենգության դեմ պայքարի վարչության պետ Վարդան Վարդանյանը լրագրողների հետ հանդիմպանը հայտնել էր, որ Հայաստանը տարանցիկ ուղի է հանդիսանում` ԻԻՀ–ից այլ երկրների թմրանյութերի փոխադրման համար։
Պաշտոնական տվյալներով` 2018թ–ի համեմատ 2019թ–ին Հայաստան ներկրվող թմրամիջոցների ծավալն ավելացել է ավելի քան 10 անգամ։
Կեսգիշերին թմրանյութերի փաթեթ են նետել «Սևան» ՔԿՀ–ի տարածք
2019թ–ի ընթացքում Հայաստանի սահմանին հայտնաբերել ու առգրավվել է 11 կգ ափիոն, 8.2 կգ մետամֆետամին, 3 կգ կետամին, 1.3 կգ մարիխուանա և հաշիշ, հաշիշի յուղի պարունակությամբ 74 էլեկտրոնային սիգարետ և մուշտուկ, թմրամիջոց և հոգեմետ նյութեր պարունակող 16 500 դեղահաբ։