ԵՐԵՎԱՆ, 5 փետրվարի — Sputnik. Քաղաքաշինության կոմիտեի նախագահ Վահագն Վերմիշյանի աշխատասենյակում խուզարկություն է իրականացրել Ազգային անվտանգության ծառայությունը։ Sputnik Արմենիայի հետ զրույցում այս լուրը հաստատեցին ԱԱԾ մամուլի ծառայությունից։
«Դեպքի հետ կապված այլ մանրամասներն ԱԱԾ–ն շուտով կհաղորդի հաղորդագրության միջոցով»,–ասացին ԱԱԾ–ից։
Հիշեցնենք`hraparak.am–ն այսօր գրել էր, որ Վահագն Վերմիշյանի դեմ կա հարուցված քրեական գործ՝ կոռուպցիոն չարաշահումների և հովանավորչության հանցակազմով։ Վերմիշյանը հերքել էր իր առնչությունն այդ քրեական գործին։
Քիչ առաջ խուզարկություն էր կատարվել Վերմիշյանի աշխատասենյակում և Վերմիշյանին ու նրա համակարգիչները քննիչները տարել էին իրենց հետ։
Վահագն Վերմիշյանը Քաղաքաշինության կոմիտեի նախագահ է նշանակվել 2019 թվականի մարտի 21-ին։