Արցախի նախագահի մամուլի խոսնակ, Արցախի պահպանողական կուսակցության նախագահ, Դավիթ Բաբայանը Sputnik Արմենիայի հետ զրույցում նշեց, որ տարբեր ոլորտների համար ունեն կարգախոսներ, որոնք ներառում են կուսակցության տեսլականն ու ռազմավարության բովանդակությունը։ Կուսակցության կարգախոսներից մեկը «Ավելի լավ Արցախն» է:
«Չենք ցանկանում խոսել ձևական թեմաներից, ուզում ենք պահպանել այն, ինչն ունենք, փորձենք շտկել թերությունները, երբևէ չքարկոծենք իրար, աշխատենք միասին: Սա դինամիկ գործընթաց է, մեկ օրվա, մեկ տարվա բան չէ»,- ասաց նա:
ԱՊԿ առաջնորդի խոսքով` բոլոր քաղաքական ուժերն իրարից տարբերվում են, սակայն ԱՊԿ-ի յուրահատկությունն այն է, որ պետք է հանդես գան բարձր պրոֆեսիոնալիզմի ու բարոյական բարձր որակների սիմբիոզի միջոցով, որովհետև Արցախն ու, ընդհանուր առմամբ, տարածաշրջանը թևակոխում է շատ յուրահատուկ ժամանակահատված:
«Որպեսզի դիմակայենք մարտահրավերներին, քաղաքական դաշտում մեզ պետք են նշված որակներով օժտված մարդիկ»,- նշեց Բաբայանը:
Դավիթ Բաբայանն իր թեկնածությունն է առաջադրելու Արցախի նախագահական ընտրություններում
Ընտրություններում հնարավորությունների մասին խոսելը, Բաբայանը, ճիշտ չի համարում և հռետորական հարցադրում է անում`պատերազմի ժամանակ որևէ մեկը գիտի՞, թե ինչ է լինելու իր հետ: Հետևաբար իրենք կպայքարեն, և ամեն ինչ կախված կլինի իրենց տարած աշխատանքից:
Ըստ Բաբայանի՝ օրենքը պետք է պահպանվի և բոլորը պետք է ձգտեն ավելի լավ Արցախ ունենալ: Դա մեկ-երկու քայլով հնարավոր չէ իրականացնել, սակայն քայլերից մեկը պետք է լինի անձնական օրինակով սկզբունքների, պրոֆեսիոնալիզմի, բարոյական բարձր որակների պահպանումը:
«Դրա շնորհիվ կարելի է արդյունավետորեն լուծել շատ հարցեր ու հասնել համախմբվածության: Մարդիկ պետք է ունենան տարբեր, նույնիսկ իրարամերժ կարծիքներ, բայց ավելի լավ տարբերակ ընտրելը նշանակում է նորմալ, ցիվիլ երկխոսություն, թշնամանքի բացառում»,- ընդգծեց Բաբայանը:
ԱՊԿ-ի թեկնածուն իր ծրագրով փորձելու է այնպես անել, որ Արցախի հասարակությունը ցանկացած ընտրությունից շահի և ընթանա էվոլյուցիոն ճանապարհով, պատրաստ լինի ցանկացած զարգացումների: Իսկ հաղթանակի գրավականներից մեկն, ըստ Բաբայանի, արժեհամակարգի պահպանումն է:
Հակոբյան. «Արցախում իրականացվում է նախագահի թեկնածուների յուրատեսակ քասթինգ»
Նշենք, որ Արցախի պահպանողական կուսակցության (ԱՊԿ) արտահերթ համագումարում և խորհրդի նիստում Արցախի խորհրդարանական և նախագահական ընտրություններին մասնակցելու որոշում է կայացվել։ ԱՊԿ-ն ընտրություններին մասնակցելու է կուսակցության առաջնորդ Դավիթ Բաբայանի գլխավորությամբ:
Հիշեցնենք` Արցախի համապետական ընրությունները կկայանան 2020թ-ի մարտի 31-ին։
Այս պահին նախագահի հավանական թեկնածուներն են Արցախի նախկին վարչապետ Արայիկ Հարությունյանը, Արցախի արտգործնախարար Մասիս Մայիլյանը, պատգամավոր Հայկ Խանումյանը, ԱԽ նախկին քարտուղար Վիտալի Բալասանյանը, պատգամավորներ Վահան Բադասյանն ու Ռուսլան Իսրայելյանը, «Արցախյան արվեստի ֆորում» հիմնադրամի տնօրեն Քրիստին Բալայանը և ԱԺ նախագահ Աշոտ Ղուլյանը։
Գործող նախագահ Բակո Սահակյանն արդեն հայտարարել է, որ 2020 թվականի ընտրությանը չի մասնակցելու։