ԵՐԵՎԱՆ, 3 փետրվարի — Sputnik. Արցախի ՊԲ զորամասերից մեկում ժամկետային զինծառայող է վիրավորվել: Տեղեկությունը Sputnik Արմենիայի հետ զրույցում հաստատեց ՀՀ ՊՆ մամուլի խոսնակ Արծրուն Հովհաննիսյանը՝ նշելով, որ զինծառայողը պատահաբար ինքն իր ոտքին է կրակել:
«Լուրջ բան չկա, կյանքին վտանգ չի սպառնում»,-ասաց Հովհաննիսյանը:
Նշենք, որ թեև վերջին շրջանում Ադրբեջանի հետ Հայաստանի ու Արցախի սահմաններին համեմատաբար հանգիստ է, սակայն հայկական բանակում վերջին 10 օրվա ընթացքում մի քանի ցավալի դեպք է արձանագրվել։
Հունվարի 24–ին Արցախի Պաշտպանության բանակում 2 զինծառայող վիրավորում էին ստացել, ՀՀ քննչական կոմիտեում քրգործ էր հարուցվել սպանության և ինքնասպանության հասցնելու հոդվածներով։
Իսկ մի քանի օր անց` հունվարի 30–ին, ժամը 13:15-ի սահմանում, ՊԲ կենտրոնական ենթակայությամբ գործող զորամասերից մեկում, դեռևս չպարզված հանգամանքներում, մահացու հրազենային վիրավորում էր ստացել ՊԲ զինծառայող, 2000թ. ծնված Վահրամ Մկրտիչի Ավագյանը:
Ավելի ուշ հաղորդվեց, որ զինվորը մահացել է իրեն ամրակցված ԱԿՄ տեսակի ինքնաձիգից արձակած կրակոցներից ստացած հրազենային վիրավորումից, սակայն նրա հարազատները չեն հավատում ինքնասպանության վարկածին և արդար քննություն են պահանջում։