ԵՐԵՎԱՆ, 30 հունվարի — Sputnik. ՀՀ արդարադատության նախարար Ռուստամ Բադասյանը կառավարության այսօրվա նիստի ավարտին լրագրողների հետ զրույցում հայտնեց, որ դատական համակարգում, մասնավորապես` Սահմանադրական դատարանում առկա ճգնաժամը կարող է հանգուցալուծվել սահմանադրական փոփոխությունների արդյունքում։
«Հիմա, կարծում եմ, ինչ լուծում էլ գտնենք, այդ լուծումն ամբողջությամբ, 100 տոկոսով չի կարող հիմք հանդիսանալ հասարակության վստահությունը դատական համակարգի նկատմամբ վերականգնելու համար»,– ասաց նա։
Բադասյանը չբացառեց, որ Սահմանադրության փոփոխությամբ կձևավորվի նոր Սահմանադրական դատարան, թեև այդ դրույթն առայժմ ներառված չէ հրապարակված փոփոխություններում։ Նոր ՍԴ ձևավորելու հարցն արդարադատության նախարարն անպատասխան թողեց` այդ իրավասությունը պատվիրակելով առաջիկայում ձևավորվող սահմանադրական բարեփոխումների հանձնաժողովին։
ՔԿՀ-ներում աշխատավարձերը բարձրացրել են. նախարարը` թափուր հաստիքների մասին
«Սահմանադրական փոփոխություններով պետք է անցում ապահովվի դեպի նոր մարմիններ։ Այդ անցումը պետք է ապահովվի իրավունքի գերակայության սկզբունքը հաշվի առնելով, սահմանված ընթացակարգերով։ Մնացած մանրամասները, թե ինչ մոդել կընտրվի, այդ անցումն ինչպես կկատարվի, ինչ ընթացակարգերով, թույլ տվեք, որ հանձնաժողովը որոշի»,– ասաց նա։
Ինձ ոչինչ չի կանգնեցնելու. Հրայր Թովմասյանը հիշեցրել է, որ սասունցու կող ունի
Հիշեցնենք, որ Նիկոլ Փաշինյանի` 2019 թվականի դեկտեմբերի 30-ի որոշմամբ` մեկնարկել է սահմանադրական բարեփոխումների մասնագիտական հանձնաժողովի ստեղծման գործընթացը: Ըստ այդ որոշման՝ հանձնաժողովի կազմում, ՀՀ դատական և իրավական բարեփոխումների 2019-2023 թվականների ռազմավարությանը համապատասխան, մրցութային ընթացակարգով ընդգրկվել են վեց իրավաբան գիտնական և հասարակական կազմակերպությունների երկու ներկայացուցիչ: