ԵՐԵՎԱՆ, 29 հունվարի — Sputnik. Հեռուստատեսության և ռադիոյի հանձնաժողովի նախագահ Տիգրան Հակոբյանն այսօր հրավիրված ասուլիսի ժամանակ հայտնեց, որ 2019թ–ի ընթացքում հանձնաժողովը 6 200 000 դրամի տուգանքի որոշումներ է կայացրել Հայաստանի 12 հեռուստառադիոընկերությունների նկատմամբ։
Նրա խոսքով` 2019թ–ի ընթացքում կայացված տուգանքի որոշումները շուրջ 1 մլն դրամով գերազանցում են նախորդ 7 տարիների ընթացքում կայացրած որոշումների հանրագումարը։
«Մենք սկսել ենք լիովին իրականացնել մեր պարտավորությունները։ Օրինակ` եթե նախկինում որևէ հեռուստաընկերություն չի տուգանվել սարսափ տեսարաններ ցուցադրելու համար, անցած տարի մենք մի հեռուստաընկերության տուգանեցինք 00։00–ից շուտ այդպիսի տեսարաններ ցուցադրելու համար, որոնք իսկապես սոսկալի կադրեր էին»,– ասաց նա։
Մեկ այլ հեռուստաընկերություն տուգանվել է կրոնական խտրականության, մասնավորապես` իսլամը շատ կոպիտ ու սխալ լուսաբանելու համար։ Տուգանքի որոշումների մեծ մասը վերաբերել են հեղինակային իրավունքի խախտման դեպքերին։
Իսկ տուգանքների տարափ տեղի է ունեցել 2019թ–ի հունիսին` կապված գովազդի մասին օրենքի համատարած խախտումների հետ։
«Ցավոք, նախկինում կային ընտրյալներ։ Օրինակ`մենք ունեինք մեկ ռադիոընկերություն, որին իրավունք էր վերապահված 14 րոպեի փոխարեն 17-18 րոպե գովազդ հեռարձակել 14 ժամվա ընթացքում։ Ու բնական է, որ դա անհավասար մրցակցային պայմաններ էր ստեղծում մյուսների համար»,– ասաց Հակոբյանը։
Սերիալներն անտանելի են. Լեզվի կոմիտեի նախագահը պատմեց, թե ինչ է լսել էկրանից
ՀՌՀ նախագահը նաև հայտնեց, որ հեռուստաընկերություններից երկուսն ու մեկ ռադիոընկերություն դատական հայց են ներկայացրել` բողոքարկելու հանձնաժողովի որոշումները, ինչը, նրա խոսքով, իրենց ուրախացնում է, քանի որ իրավական ճիշտ դաշտ է ստեղծում հանձնաժողովի ու հեռարձակողների աշխատանքային հարաբերություններում։
«Սոյուզմուլտֆիլմի» ոսկյա հավաքածուի մուլտֆիլմերը կթարգմանվեն հայերեն