ԵՐԵՎԱՆ, 23 հունվարի — Sputnik. ՀՀ նախագահ Արմեն Սարգսյանն Իսրայելի խորհրդարանում այսօր բարձրացրել է Իսրայելի Քնեսեթում Հայոց ցեղասպանության ճանաչման հարցը։
«Հայոց ցեղասպանության ճանաչումն առաջին հերթին բարոյական պատասխանատվություն է և հարգանքի տուրք` անմեղ զոհերի հիշատակին։ Միաժամանակ այն կարևոր ներդրում է ցեղասպանությունների և մարդկության դեմ հանցագործությունների կանխարգելման միջազգային ջանքերում»,-շեշտել է Հայաստանի նախագահը:
Նրա խոսքով` պատմության շատ էջեր ողբերգական են հայ և հրեա ժողովրդի համար, և պետք է համատեղել ջանքերը, որպեսզի նման մարդկային աղետներ այլևս երբեք չլինեն և չկրկնվեն։ Հայաստանի նախագահը ընդգծել է, որ պատմության այս ամոթալի էջի` Հայոց ցեղասպանության ճանաչումն ու դատապարտումը չպետք է պայմանավորված լինի այսօրվա քաղաքական շահերով ու իրողություններով:
ԱՄՆ Պետդեպարտամենտն արձագանքել է Հայոց ցեղասպանության վերաբերյալ Սենատի բանաձևին
Քնեսեթի նախագահ Յուլի Էդելշտեյնը նշել է, որ իրենց համար մեծ պատիվ է Իսրայելում ընդունել ՀՀ նախագահին։ Նա վստահություն է հայտնել, որ նախագահ Սարգսյանի այցը, ինչպես նաև Իսրայելում դեսպանություն բացելու՝ Հայաստանի որոշումը, կարևոր անկյունաքար կլինեն երկկողմ հարաբերությունների հետագա զարգացման համար:
«Իրականում». ԱՄՆ Սենատն էլ ճանաչեց Հայոց ցեղասպանությունը. բայց գործընթացը դեռ ավարտված չէ
«Մեր գործակցության ներուժը շատ ավելին է, քան մենք ներկայում օգտագործում ենք»,- ասել է Իսրայելի Քնեսեթի նախագահը։
Հիշեցնենք, որ Արմեն Սարգսյանը Իսրայելի Պետության նախագահ Ռեուվեն Ռիվլինի հրավերով Իսրայելում է՝ մասնակցելու Հոլոքոսթի հիշատակին նվիրված 5-րդ միջազգային համաժողովին: