ԵՐԵՎԱՆ, 22 հունվարի — Sputnik. ՀՀ փոխվարչապետ Մհեր Գրիգորյանն այսօր ԱԺ–ում հարցուպատասխանի ժամանակ հումորով արձագանքեց գազի թանկացման ու «Գազպրոմ Արմենիայում» կատարված կրճատումներին վերաբերող հարցերին։
Սակագինը կավելանա. Վրաստանը բացահայտել է ռուսական գազը ՀՀ տեղափոխելու պայմանագրի դետալները
«Արդեն սկսել եմ գազի մասին հարցերից հաճույք ստանալ»,– ասաց նա։
Անդրադառնալով գազի գնի հնարավոր բարձրացմանը` փոխվարչապետը վերահաստատեց, որ կառավարության հետ ռուսական կողմի պայմանավորվածության համաձայն` այն մինչև ապրիլի 1-ը կմնա անփոփոխ։ Գազի գինն ապրիլի 1-ից հետո կորոշվի ՀԾԿՀ–ում հարցի քննարկման արդյունքում։ Իսկ սահմանին գազի գինն այս տարվա ընթացքում չի փոխվի։
Ինչ վերաբերում է «Գազպրոմ Արմենիայում» կատարված կրճատումներին, որոնց թիվը ոչ պաշտոնական տվյալներով 800-900 է, Գրիգորյանը նշեց, որ նման կրճատումները կառավարությունը միայն ողջունում է։
«Անկախ սակագնի հարցից, անկախ սահմանի վրա գազի գնի հարցից, անկախ ամեն ինչից` եթե «Գազպրոմ Արմենիայում» կան ավելորդ աշխատակիցներ, պետք է կրճատվեն։ Եվ դա վերաբերում է ոչ միայն «Գազպրոմ Արմենիային»,– ասաց նա,–ուղղակի էլեկտորատ պահել մասնավոր կառույցում, կամ առավել ևս` մի կառույցում, որը հանրային ծառայություններ է մատուցում, դրա վերջը շատ վատ կլինի»։
Փոխվարչապետը վստահեցրեց, որ կառավարությունն այսուհետ ևս բծախնդիր է լինելու «Գազպրոմ Արմենիայի» կատարած ծախսերի նկատմամբ։
Հիշեցնենք` 2019թ.–ի վերջին տեղեկություն կար, որ «Գազպրոմ էքսպորտ» ՍՊԸ-ն և «Գազպրոմ Արմենիա» ՓԲԸ-ն ռուսական գազի մատակարարման լրացուցիչ համաձայնագիր են ստորագրել, ըստ որի՝ 2020թ. Հայաստանին վաճառվող գազի գինը չի փոփոխվի և կմնա 2019թ. մակարդակին:
Այս պահին գազի սակագինը ՀՀ սահմանին 1000 խմ գազի դիմաց 165 դոլար է։
2019թ. հունվարի 1-ին գազի 1000 խմ–ը սահմանին արժեր 150 դոլար։ Թերևս այս բարձրացումն է պատճառը, որ «Գազպրոմ Արմենիան» մտադիր է բարձրացնել նաև սպառողներին մատակարարվող գազի գինը։
Երկու անհայտով հավասարում. իշխանությունը չի բացառում, որ կսուբսիդավորի գազի թանկացումը