ԵՐԵՎԱՆ, 22 հունվարի — Sputnik. ՀՀ վարչապետ Նիկոլ Փաշինյանն այսօր ԱԺ–ում հարց բարձրացրեց, թե ինչու այսօր պահանջ չի դրվում, որ ՀՀ բոլոր բնակավայրերում պետք է ծննդատուն լինի։ Վարչապետն այս հարցը բարձրացրեց` անդրադառնալով ծննդատների փակման թեմային։
ՀՀ առողջապահության նախարարությունը փոփոխություններ է նախատեսել ծննդատների աշխատանքում և որոշել է տարեկան 150–ից պակաս ծնունդ ընդունող ծննդատները փակել։ Նախարարությունն այս տարի չի ֆինանսավորել Մարալիկի, Աչաջուրի, Արտենիի, Ծաղկահովիտի, Արծվաբերդի, Քաջարանի և Եղվարդի ծննդատներին։
«Մարալիկի ծննդատունը ևս 25 գյուղերի է սպասարկում, ինչո՞ւ պետք է փակվի։ Ինձ մոտ հարց առաջացավ` ինչո՞ւ այդ 25 գյուղերում չկան ծննդատներ։ Հարցի պատասխանը պարզ է, քանի որ դա տրամաբանական պահանջ չի, քանի որ դա նույնն է, որ պահանջնենք` ամեն շենքի մոտ ծննդատուն լինի»,–ասաց Փաշինյանը։
Փաշինյանը զարմացել է, երբ հեռուսատեսությամբ տեսել է Մարալիկի ծննդատան բուժաշխատողներին, որոնք «հիվանդանոցային խալաթներով ու ոտնամաններով» դուրս էին եկել ձյան մեջ քայլում, բողոքի ակցիա էին անում։ Վարչապետն ապշել է. հետո բժիշկներն այդ նույն խալաթներով պետք է գնային ծնունդ ընդունելու։
Ծննդատների փակման պատճառով այս պահին կրճատված աշխատողներ չկան. Արսեն Թորոսյան
«Յոլա գնալու տրամաբանությամբ ենք ապրում, ու մեզ թվում է` յոլա գնալն ավելի էժան է»,–ասաց նա։
Հիշեցնենք, որ Եղվարդի ծննդատան աշխատողները երկու օր անընդմեջ բողոքի ակցիա են արել։ Առողջապահության նախարարության` տարեկան նվազագույնը 150 ծնունդ ունենալու պահանջին ամենամոտը Եղվարդի ծննդատան 2019–ի ցուցանիշն է (136 ծնունդ)։ ՀՀ առողջապահության նախարար Արսեն Թորոսյանը հայտնել էր` նախարարության մասնագետները ևս մեկ անգամ կայցելեն այնտեղ ստուգայցի։
«Եթե չկա մասնագետ և սարքավորում, ինչքան էլ բողոքեն, այդ ծննդատները չեն գործելու». Թորոսյան
Օրերս Շիրակի մարզի Անի խոշորացված համայնքի Մարալիկ քաղաքի բնակիչներն էլ փակել էին Գյումրի–Երևան ճանապարհը։ Նրանք պահանջում էին չեղարկել Մարալիկի առողջության կենտրոնի ծննդաբերական բաժանմունքի փակման որոշումը։ Ի դեպ, ըստ տվյալների` 2018 թվականին Մարալիկի առողջության կենտրոնի մանկաբարձական ծառայությունից օգտվել է 126, իսկ 2019-ին` 105 ծննդկան: