ԵՐԵՎԱՆ, 18 հունվարի–Sputnik. Հանրային ծառայությունները կարգավորող հանձնաժողովի նախագահ Գարեգին Բաղրամյանն այսօր լրագրողների հետ զրույցում հայտնեց, որ այս պահին գազի գնի քննարկումներն ու բանակցությունները շարունակվում են, և չի բացառվում, որ «Գազպրոմը» դիմի Հանրային ծառայությունները կարգավորող հանձնաժողովին գազի սակագինը վերանայելու հայտով։
«2019 թվականի հունվարից գազի սակագինը սահմանին թանկացել է։ 165 դոլար թանկացումը 2020 թվականի համար պահպանվելու է նույն մեծությամբ. դա արդեն պայմանավորված է»,– նշեց Բաղրամյանը։
Նրա խոսքով` գազի գնի վերանայման վերաբերյալ սպառիչ պատասխանը կլինի այն ժամանակ, երբ փաստացի հանձնաժողովը կստանա հայտ և կուսումնասիրի այն։
«Այս պահին բանակցությունների արդյունքներից ելնելով` կարող եմ ասել, որ չի բացառվում` ապրիլից հետո կներկայացնեն սակագնի վերանայման հայտ»,– ասաց նա` հավելելով, որ «Գազպրոմն» այլևս ի վիճակի չէ փոխհատուցել ավելացած գումարը:
Հիշեցնենք` 2019թ. վերջին տեղեկություն կար, որ «Գազպրոմ էքսպորտ» ՍՊԸ-ն և «Գազպրոմ Արմենիա» ՓԲԸ-ն ռուսական գազի մատակարարման լրացուցիչ համաձայնագիր են ստորագրել, ըստ որի՝ 2020թ. Հայաստանին վաճառվող գազի գինը չի փոփոխվի և կմնա 2019թ. մակարդակին:
Այս պահին գազի սակագինը ՀՀ սահմանին 1000 խմ գազի դիմաց 165 դոլար է։
Հայաստանում գազը կարող է թանկանալ. «Գազպրոմ Արմենիան» չի բացառում, որ կդիմի ՀԾԿՀ
2019թ. հունվարի 1-ին գազի 1000 խմ–ը սահմանին արժեր 150 դոլար։ Թերևս սա է պատճառը, որ «Գազպրոմ Արմենիան» մտադիր է բարձրացնել նաև սպառողներին մատակարարվող գազի գինը։
Նշենք, որ գազը 1000 խմ դիմաց սպառողին հասնում է գրեթե 290 դոլարով։