ԵՐԵՎԱՆ, 17 հունվարի — Sputnik. The Independent–ի թղթակիցը ՌԴ ԱԳՆ ղեկավարի պաշտոնակատար Սերգեյ Լավրովի ասուլիսի ժամանակ որոշեց ինքնատիպ հարց տալ. «Համաձա՞յն եք Մարգարիտա Սիմոնյանի այն կարծիքի հետ, թե Իրանը «մուժիկի» պես է գործել»։
Ավելի վաղ RT–ի և «Ռոսիա սեգոդնյայի» գլխավոր խմբագիր Մարգարիտա Սիմոնյանն ասել էր, որ իր ներքին համակարգմամբ Իրանն ԱՄՆ–ի հետ առճակատման հարցում իրեն «մուժիկի» պես է պահել։
Լավրովը պատասխանել է, որ Իրաքում ամերիկյան բազաներին հասցրած հարվածներից հետո և ուկրաինական Boeing 737 կործանումից ոչ շատ առաջ Իրանի սահմանների մոտ F-35–ի ենթադրյալ ներկայությունը ցուցադրում է այդ պահին առաջացած իրավիճակի նյարդային լինելը։ Դիվանագետը համոզված է` քանի դեռ հետաքննությունն ավարտված չէ, արդյունքների մասին խոսելը վաղ է։
«Հետաքննությունը չի ավարտվել, բայց դուք մեղավոր եք։ Մի՞թե մուժիկներն այդպես են վարվում»,– դիմել է նա արևմտյան գործընկերներին։
Russia Today–ի գլխավոր խմբագիրը մամուլի ասուլիսից անմիջապես հետո այս դրվագը հիշատակել է իր տելեգրամ ալիքում։
«Muzhik։ Հիշեք այս բառը», – գրել է նա (նկատի ունենալով արևմտյան ԶԼՄ–ներին. խմբ.)։
Հիշեցնենք` Մերձավոր Արևելքում իրավիճակը սրվեց ԱՄՆ–ի հարվածի հետևանքով Բաղդադում իրանցի գեներալ Ղասեմ Սոլեյմանիի մահվանից հետո։ Հետագա օրերին Իրանը մի քանի հրթիռային ավիահարվածներ հասցրեց Իրաքում տեղակայված ամերիկյան բազաներին, սակայն հրթիռակոծության հետևանքով ոչ ոք չտուժեց։ Իրավիճակը բարդացրեց «Ուկրաինայի միջազգային ավիաուղիների»` դեպի Կիև չվերթ իրականացնող Boeing 737-800–ի կործանումը։