ԵՐԵՎԱՆ, 14 հունվարի — Sputnik. Հարևան Իրանում լարված իրավիճակը չի կարող ազդել Իրանի հետ Հայաստանի առևտրի ծավալների վրա, բայց Հայաստանում կատարվող ներդրումների վրա չի ազդի։ Այսօր լրագրողների հետ հանդիպմանը նման կարծիք հայտնեց ՀՀ էկոնոմիկայի նախարար Տիգրան Խաչատրյանը։
«Իհարկե, հնարավոր է, որ դեպի Իրան առևտուրը դեռ որոշ ժամանակ չունենա այն ծավալները, որ պոտենցիալն է ենթադրում։ Բայց երբ մենք խոսում ենք օտարերկրյա ներդրումների մասին, հատկապես շեշտում ենք այն առավելությունները, որ Հայաստանը` որպես ԵԱՏՄ անդամ երկիր, մաս է կազմում մի մեծ շուկայի և չափազանց հասկանալի ու կանխատեսելի միջավայր է եվրոպական ներդրողների համար»,– ասաց նախարարը։
Այս տեսակետից, Խաչատրյանի խոսքով, տարածաշրջանային իրավիճակը չի կարող էական նշանակություն ունենալ Հայաստան եկող ներդրումների ծավալի վրա։
Հիշեցնենք` 2020թ–ի առաջին օրերին ԱՄՆ–ն հայտարարեց Իրանի նկատմամբ նոր պատժամիջոցների մասին, երբ երկու երկրների հարաբերություններում նոր լարում առաջացավ։
Նոր հայտարարված պատժամիջոցներով նախատեսվում է վերահսկել Իրանի շինարարական ոլորտը, քանի որ այն, ԱՄՆ պետդեպարտամենտի համոզմամբ, ուղղակիորեն կամ անուղղակիորեն վերահսկվում է «Իսլամական հեղափոխության պահապանների կորպուսի» (ԻՀՊԿ) կողմից։
ԱՄՆ–ն համարում է, որ ԻՀՊԿ–ն ահաբեկչական կազմակերպություն է։ Ի պատասխանը Իրանը համարում է, որ ահաբեկչական կազմակերպություն է ԱՄՆ–ի Զինված ուժերի կենտրոնական հրամանատարությունը, իսկ ԱՄՆ–ն` «ահաբեկչությունը հովանավորող պետություն»։
Իրանի և ԱՄՆ–ի հարաբերությունները սրվել են հունվարի 3-ին Բաղդադում Իրանի Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սոլեյմանիի սպանությունից հետո։
Ի պատասխան Իրանը հունվարի 8-ին հրթիռակոծել էր Իրաքում ԱՄՆ ռազմաբազան։
«Ուզում ենք զրկել ռեժիմը ռեսուրսներից». Պոմպեոն Իրանին սպառնացել է նոր պատժամիջոցներով