ԵՐԵՎԱՆ, 13 հունվարի — Sputnik. Ազգային ժողովի նախագահ Արարատ Միրզոյանը վստահեցնում է` ներկայիս իշխանության գերխնդիրը ՍԴ նախագահ Հրայր Թովմասյանի հրաժարականը չէ. Միրզոյանը նման կարծիք հայտնեց լրագրողների հետ ճեպազրույցում` Ծիծեռնակաբերդում, ուր այցելել էր հարգանքի տուրք մատուցելու Բաքվում ոճրագործության զոհ դարձած հայերի հիշատակին։ Բաքվում իրականացված հայերի ջարդի 30-րդ տարելիցի կապակցությամբ Ծիծեռնակաբերդ էին այցելել նաև ՀՀ վարչապետ Նիկոլ Փաշինյանը, Ամենայն Հայոց Կաթողիկոս Գարեգին Բ-ն, Ազգային ժողովի նախագահ Արարատ Միրզոյանը, բարձրաստիճան այլ պաշտոնյաներ։
«Հրայր Թովմասյանի կամ որևէ այլ անձի` երբևէ կատարած հանցագործությունը կապ չունի այս պահին կամ նախկինում նրա ունեցած պաշտոնի հետ։ Քաղաքական հետապնդումների մասին խոսք լինել անգամ չի կարող, և այնպես էլ չի, որ մենք քնում–զարթնում ենք մտածելով` Թովմասյանին հեռացնել ՍԴ–ից»,–ասաց Միրզոյանը։
Նրա խոսքով` Հրայր Թովմասյանի դեմ հարուցված քրեական գործն էլ ամենևին կապ չունի նրա պաշտոնավարման հետ, և այս երկու երևույթները պետք է իրար հետ չկապել։
Լրագրողները հետաքրքրվեցին նաև, թե Սուրբ Ծննդյան օրը, երբ Միրզոյանը տեսել է Թովմասյանին` խոսե՞լ է այս ամենի մասին` ԱԺ խոսնակը պատասխանեց` ոչ, ընդամենը մեկ–երկու կատակ են արել և վերջ։
Ո՞ւմ մեղքով են ԱԺ տասնյակ աշխատակիցներ ապօրինի ազատվել աշխատանքից. «Հրապարակ»
Հիշեցնենք, որ 2019–ի դեկտեմբերի 27–ին ՀՔԾ–ն հարցաքննել էր Թովմասյանին ու մեղադրանք առաջադրել։ 2019թ.–ի հոկտեմբերի 17-ին ՀՔԾ–ն հայտնեց, որ ՀՀ ԱԺ պատգամավոր Արման Բաբաջանյանը ՀՀ գլխավոր դատախազին հաղորդում է ներկայացրել, որ մի խումբ պաշտոնատար անձինք յուրացրել են իշխանությունը։
Որոնք են Արարատ Միրզոյանի «սրտի օրենքները». ԱԺ նախագահն ամփոփեց տարին
Հաղորդման հիման վրա ՀՀ հատուկ քննչական ծառայությունում նախապատրաստված նյութերով որոշում է կայացվել ՀՀ քրեական օրենսգրքի 300-րդ հոդվածի 1-ին մասով (այն է` իշխանությունը զավթելը` բռնություն գործադրելու կամ բռնություն գործադրելու սպառնալիքի միջոցով, ինչպես նաև Սահմանադրությամբ չնախատեսված այլ եղանակով Հանրապետության Նախագահի, Ազգային ժողովի, կառավարության կամ սահմանադրական դատարանի լիազորություններին տիրանալը) քրեական գործ հարուցելու մասին: Բաբաջանյանի հայտարարությունը վերաբերում է ՍԴ նախագահ Հրայր Թովմասյանին: