ԵՐԵՎԱՆ, 12 հունվար – Sputnik. Արմենիա Էյրվեյզ Ավիաընկերության հունվարի 12-ին նախատեսված Երևան-Թեհրան-Երևան չվերթը չեղարկվել է անվտանգության նկատառումներից ելնելով, հայտնում է ՀՀ քաղավիացիայի կոմիտեն։
Նշվում է, որ ուղևորները ավիատոմսերի օրը փոխելու համար կարող են կապ հաստատել կոմիտեի գլխավոր գրասենյակի կամ գործակալների հետ։
«Հայցում ենք Ձեր ներողամտությունը պատճառած անհարմարության համար։ Մենք հոգում ենք մեր ուղևորների անվտանգության մասին` առաջին հերթին։ Լրացուցիչ տեղեկությունների համար կարող եք կապվել Արմենիա Էյրվեյզ ավիաընկերության գլխավոր գրասենյակ աշխատանքային ժամերին, Երկուշաբթի-Ուրբաթ սկսած 9:30:»,- նշված է կոմիտեի տարածած հաղորդագրության մեջ։
Հունվարի 10-ին էլ «UR» ավիաընկերության նախաձեռնությամբ չեղարկվել էր հունվարի 12-ին նախատեսած Էրբիլ-Երևան-Էրբիլ չվերթը։
Հիշեցնենք` հունվարի 7-ի, լույս 8-ի գիշերը ուկրաինական ընկերությանը պատկանող Boeing 737-800–ը կործանվել էր թռիչքից գրեթե անմիջապես հետո Թեհրանի օդանավակայանից քիչ հեռու։ Մահացել էին օդանավում գտնվող բոլոր ուղևորներն ու անձնակազմի անդամները, ընդհանուր` 176 մարդ։ Նույն գիշեր Իրանը հրթիռակոծել էր Իրաքի տարածքում տեղակայված ամերիկյան ռազմաբազան և ավիաբազան։ Այս գործողությունը հաջորդել էր հունվարի 2-ի, լույս 3-ի գիշերը տեղի ունեցած դեպքերին, երբ ԱՄՆ–ն Բաղդադի միջազգային օդանավակայանի շրջակայքում գործողություններ էր իրականացրել Իրանի Իսլամական հեղափոխության պահապանների կորպուսի (ԻՀՊԿ) «Ղոդս» ստորաբաժանման հրամանատար 62-ամյա գեներալ Ղասեմ Սոլեյմանիի և իրաքյան շիական աշխարհազորի ղեկավարի տեղակալ Աբու Մահդի ալ Մուհանդիսի դեմ, և այդ գործողությունների հետևանքով նրանք երկուսն էլ մահացել էին։ ԻՀՊԿ-ն էլ հայտարարել էր, որ գեներալ Ղասեմ Սոլեյմանիի սպանության համար ամերիկացիներից վրեժ լուծելու գործողություն է իրականացնելու։
Մոսկվայի ու Դուբայի հետ Երևանի օդային կապը ժամանակավորապես դադարեցվել է
Ավելի վաղ ՀՀ քաղաքացիական ավիացիայի կոմիտեի մամուլի ծառայությունը հայտնել էր, որ Իրանի օդային տարածքով թռիչքները դադարեցնելու հիմք չկա։