ԵՐԵՎԱՆ, 10 հունվարի — Sputnik. Մոտակա 1-2 տարվա ընթացքում Մերձավոր Արևելքում իրավիճակը հանգիստ չի լինի։ Այսօր Sputnik Արմենիա մուլտիմեդիոն մամուլի կենտրոնում կայացած ասուլիսի ժամանակ այս մասին ասաց Հայաստանի Գիտությունների ազգային ակադեմիայի արևելագիտության ինստիտուտի տնօրեն, ակադեմիկոս Ռուբեն Սաֆրաստյանը։
«Ամերիկա–իրանական հակամարտության առաջին` մարտավարական փուլն ավարտված է, հիմա Իրան–ԱՄՆ հակամարտությունը կտեղափոխվի ռազմավարական հարթություն։ Իրանը հայտարարել է, որ ամեն ինչ կանի, որ վերջ տա ամերիկյան զինված ուժերի ներկայությանը Մերձավոր Արևելքում։ Եթե ԱՄՆ–ն չգնա այդ քայլին ու զորքերը չհանի, ապա Իրան–ԱՄՆ բախումը կտեղափոխվի ռազմավարական հարթություն»,–ասաց Սաֆրաստյանը։
Նրա խոսքով` այս հարցում ԱՄՆ–ն խնդիրները միանշանակ չի դնում։ Սաֆրաստյանը հիշեցրեց` երբ իշխանության էր գալիս Դոնալդ Թրամփը, նա հայտարարել էր, որ պետք է փորձի թուլացնել ԱՄՆ–ի ռազմական ներկայությունը տարբեր երկրներում։ Սակայն Թրամփին դա չի հաջողվում անել, քանի որ ամերիկյան վերնախավն այս հարցում համամիտ չէ նախագահի հետ։
Իրանի տնտեսության թուլացումը Հայաստանի համար վատ հետևանքներով է հղի. իրանագետ
Հիշեցնենք` Մերձավոր Արևելքում իրավիճակը սրվեց հունվարի 3–ին Բաղդադում ամերիկյան հարվածների հետևանքով իրանցի գեներալ Ղասեմ Սոլեյմանիի մահից հետո։ Հունվարի 7-ի, լույս 8-ի գիշերն Իրանը հրթիռային հարվածներ հասցրեց Իրաքում տեղակայված ամերիկյան բազաներին։ Հրթիռակոծությունից հետո ԱՄՆ առաջնորդը նահանջեց` ասելով, որ պատրաստ է խաղաղության, սակայն մյուս կողմից էլ հայտարարեց Թեհրանի նկատմամբ նոր պատժամիջոցներ կիրառելու մասին։
Եթե հարկ լինի, ՀՀ–ն պատրաստ է միջնորդել. Գրիգորյանը` ԱՄՆ–Իրան հարաբերությունների մասին