ԵՐԵՎԱՆ, 9 հունվարի — Sputnik. Իրանի դեմ ԱՄՆ նոր պատժամիջոցները եթե չսառեցնեն, ապա կբարդացնեն Երևանի և Թեհրանի միջև առկա տնտեսական և կոմունիկացիոն նախագծերը, այսօր լրագրողներին ասաց իրանագետ Գոհար Իսկանդարյանը։
ԱՄՆ նախագահ Դոնալդ Թրամփը ժողովրդին ուղղված իր ուղերձում հայտարարել է, որ Իրանի նկատմամբ նոր պատժամիջոցներ կկիրառվեն, որոնք կգործեն այնքան ժամանակ, մինչև «այդ երկիրն իր վարքագիծը չփոխի»։
«ԱՄՆ–ն Իրանին նոր պատժամիջոցներով է սպառնում` կոչ անելով եվրոպացի գործընկերներին նույնպես նմանատիպ միջոցներ ձեռնարկել։ Հայաստանի համար այդ գործընթացները հղի են տնտեսական վնասով, քանի որ իրանական տնտեսության անխուսափելի թուլացումը թույլ չի տա ինչ-որ լրացուցիչ միջոցներ ուղղել Հայաստանի հետ ծրագրերի իրականացման համար», – նշեց Իսկանդարյանը։
Նրա խոսքով` Իրանն ու ԱՄՆ–ն հեռու են բանակցելուց, անկախ Դոնալ Թրամփի երեկվա ելույթում առկա հաշտարար տարրերից։ Իսկանդարյանը նկատեց, որ ԱՄՆ–ն մինչև հիմա հրաժարվում է վիզա տրամադրել Իրանի արտգործնախարարին Նյու Յորքում ՄԱԿ–ի անվտանգության խորհրդի նիստին մասնակցելու համար։ Դա ՄԱԿ–ի նորմերի խախտում է։
Իրանում ավտոբուս է վթարվել. մահացածների մեջ ՀՀ քաղաքացիներ չկան
Իր հերթին ասում է արևելագետ Սարգիս Գրիգորյանը կարծում է, որ Իրանի և Ամերիկայի հարաբերություններում դեէսկալացիա տեղի ունեցավ, կողմերը «մուսկուլները» շարժեցին, ցուցադրեցին իրենց հնարավորություններն ու հանդարտվեցին։ Սակայն, արևելագետի կարծիքով, նրանց միջև անուղղակի բախումները կշարունակվեն։
«Մա՛հ Ամերիկային». Իրանում հրաժեշտ են տալիս գեներալ Ղասեմ Սոլեյմանիին
Գրիգորյանի խոսքով` ամենասկզբից ակնհայտ էր, որ բանը լայնածավալ մարտական գործողությունների չի հասնի։ Ինչպես ԱՄՆ–ում, այնպես էլ Իրանում 2020 թվականին ընտրություններ են սպասվում, իսկ պատերազմը լավագույն միջոց չէ նախընտրական արշավի համար։
Այնուամենայնիվ, Գրիգորյանը կարծում է, որ կայունացման հասնելու համար դեռ շատ ժամանակ է պետք։ Նա հիշեցնում է, որ նախորդ գիշեր Բաղդադում ԱՄՆ դեսպանատան մերձակայքում իրանամետ շիական խմբավորումները մի քանի հրթիռ են գցել։ Սա նշանակում է, որ Վաշինգտոնի և Թեհրանի միջև անուղղակի հակամարտությունը կշարունակվի։
Փորձագետը քիչ հավանական է համարում նաև Իրաքի տարածքից ամերիկյան զորքի հեռացումը։ Արաբական այդ երկրի խորհրդարանը կողմ է քվեարկել ամերիկյան ստորաբաժանումները դուրս բերելուն, սակայն Վաշինգտոնը հասկացրել է, որ մտադիր չէ լքել տարածքը։ Գրիգորյանի կարծիքով, հազիվ թե Բաղդադը լուրջ լծակներ ունենա ամերիկացիների վրա ճնշում գործադրելու համար, որպեսզի ստիպի նրանց հեռանալ։
Հիշեցնենք`Մերձավոր Արևելքում իրավիճակը սրվեց հունվարի 3–ին Բաղդադում ամերիկյան հարվածների հետևանքով իրանցի գեներալ Ղասեմ Սոլեյմանիի մահից հետո։ Հետագա օրերին Իրանը մի շարք հրթիռային հարվածներ հասցրեց Իրաքում տեղակայված ամերիկյան բազաներին։ Իսկ ԱՄՆ նախագահ Դոնալդ Թրամփը սպառնաց վերացնել Իրանի առանցքային օբյեկտները, այդ թվում նաև մշակութային հուշարձանները։ Հրթիռակոծությունից հետո ԱՄՆ առաջնորդը նահանջեց` ասելով, որ պատրաստ է խաղաղության, սակայն մյուս կողմից էլ հայտարարեց Թեհրանի նկատմամբ նոր պատժամիջոցներ կիրառելու մասին։