ԵՐԵՎԱՆ, 8 հունվարի — Sputnik. Իրանում վթարի ենթարկված ուկրաինական ինքնաթիռը տեխնիկապես սարքին էր։ Այս մասին Ուկրաինայի Բարիսպոլ քաղաքի օդանավակայանում հրավիրված ասուլիսի ընթացքում հայտարարել է «Ուկրաինայի միջազգային ավիաուղիների» նախագահ Եվգենի Դիխնեն։
«Այն մեր լավագույն ինքնաթիռներից մեկն էր։ Մենք երաշխավորում ենք մեր բոլոր ինքնաթիռների տեխնիկական սարքինությունը և անձնակազմերի մասնագիտական պատրաստվածությունը»,– ասել է նա` հավելելով, որ օդանավը պլանային տեխնիկական սպասարկում է անցել թռիչքից 2 օր առաջ` հունվարի 6-ին։
Լրագրողների հարցերին, թե որքանով է հնարավոր, որ օդանավի վթարը կապ ունենա Իրանում ստեղծված իրավիճակի հետ, Դիխնեն հայտարարեց, որ իրենք մեկնաբանում ու հայտարարում են միայն պաշտոնական տեղեկատվությունը։
Իրանում կործանված Boeing-737 ինքնաթիռում Հայաստանի քաղաքացիներ չեն եղել. ՀՀ ԱԳՆ
Այս պահին, նրա խոսքով, աշխատանքն է սկսում վթարի պատճառները հետաքննող հատուկ հանձնաժողովը` 2 երկրների քաղավիացիայի պետական մարմինների ու «Ուկրաինայի միջազգային ավիաուղիների» ներկայացուցիչների մասնակցությամբ։
«Դա սովորական չվերթ էր, ու երեկ որևէ պատճառ մենք չենք ունեցել թռիչքը չեղարկելու։ Եթե փոքր իսկ վտանգ լիներ, մենք կդադարեցնեինք թռիչքներն այդ հատվածում»,– հայտարարեց ավիաընկերության ներկայացուցիչը։
Նա նաև հայտնեց, որ վթարված ինքնաթիռում Ուկրաինայի քաղաքացիները շատ չէին, քանի որ ուղևորների մեծ մասը տրանզիտային էին, որոնք Բորիսպոլի օդանավակայանից ծրագրում էին մեկնել այլ ուղղություններով։
Եվգենի Դիխնեն նաև հայտնեց, որ «Ուկրաինայի միջազգային ավիաուղիների» աշխատակիցներն ու հոգեբաններն այս պահին Ուկրաինայում աշխատում են զոհերի ընտանիքների հետ։
Հրթիռային հարձակման հետևանքով ԱՄՆ–ն մեծ կորուստներ է կրել. իրանական ԶԼՄ–ներ
Հիշեցնենք` ուկրաինական Boeing 737-8KV ինքնաթիռը հունվարի 8-ին թռիչքից անմիջապես հետո կործանվել էր Իմամ Խոմեյնիի անվան օդանավակայանի մոտակայքում։ Մահացել են ինքնաթիռում գտնվող 167 ուղևորներն ու անձնակազմի 9 անդամները։
Թեհրանի օդանավակայանի պաշտոնական ներկայացուցիչը վթարից հետո հայտարարել էր, որ ինքնաթիռի կործանման հիմնական պատճառը շարժիչի այրումն է եղել։