ԵՐԵՎԱՆ, 8 հունվարի — Sputnik. ԱՄՆ–ն նոր պատժամիջոցներ կկիրառի Իրանի դեմ, որոնք կգործեն այնքան ժամանակ, մինչև «այդ երկիրն իր վարքը չփոխի»։ Այս մասին հայտարարել է ԱՄՆ նախագահ Դոնալդ Թրամփը` դիմելով ժողովրդին։
Ամերիկայի առաջնորդը չի պարզաբանել, թե կոնկրետ ինչ պատժամիջոցների մասին է խոսքը։
«Իրանը միջուկային զենքի հասանելիություն չի ստանա, քանի դեռ ես եմ ԱՄՆ նախագահը», – հայտարարել է Թրամփը։
Անդրադառնալով Իրաքում ամերիկյան բազաներին հասցված հարվածների թեմային` Թրամփն ընդգծել է, որ ոչ ոք չի տուժել, բազաներին հասցված վնասը նվազագույն էր, և Ամերիկայի ժողովուրդը պետք է գոհ ու շնորհակալ լինի։
ԱՄՆ նախագահի խոսքով` Իրանը կարծես թե որոշել է նահանջել, և դա լավ է հակամարտության բոլոր կողմերի ու ամբողջ աշխարհի համար։
Թրամփը հերթական անգամ հիշեցրել է գեներալ Սոլեյմանիի մասին` հայտարարելով, որ նրան վաղուց էր պետք վերացնել, իսկ նրա սպանությունը մեսիջ է ամբողջ աշխարհի ահաբեկիչներին։ ԱՄՆ նախագահի խոսքով` Սոլեյմանին` որպես «Ղոդս» ստորաբաժանման ղեկավար, հարձակում էր նախապատրաստում Իրաքում ԱՄՆ դեսապանատան վրա, սակայն զինվորականներին հաջողվել է կանխել դա։
Որտեղ է սպանվել իրանցի գեներալը. համացանցում լուսանկարներ են հայտնվել
«Սոլեյմանին նոր հարվածներ էր նախապատրաստում ամերիկյան թիրախները խոցելու համար, բայց մենք նրան կանգնեցրինք», – հայտարարել է Թրամփը։
ԱՄՆ նախագահը կոչ է արել դաշնակիցներին հրաժարվել Իրանի հետ միջուկային համաձայնագրից և աշխատել Իրանի հետ նոր համաձայնագրի վրա, որը աշխարհն ավելի ապահով կդարձնի։
Հիշեցնենք, որ Իսլամական հեղափոխության պահապանների կորպուսը հայտարարել է գեներալ Ղասեմ Սոլեյմանիի սպանության համար ամերիկացիներից վրեժ լուծելու գործողության մեկնարկի մասին։ Հունվարի 8–ի գիշերը հրթիռակոծվել են Իրաքի տարածքում տեղակայված ամերիկյան ռազմաբազան և ավիաբազան։