ԵՐԵՎԱՆ, 8 հունվարի — Sputnik. Իրանի տարածքում գիշերը գրանցված երկրաշարժը Հայաստանի տարածքում չի զգացվել։ Sputnik Արմենիային այս մասին հայտնեց «Սեյսմիկ պաշտպանության տարածքային ծառայություն» ՊՈԱԿ–ի տնօրենի ժամանակավոր պաշտոնակատար Սոս Մարգարյանը։
«Երկրաշարժ գրանցվելն ու զգացվելը տարբեր բաներ են։ Մենք օրական շատ թույլ երկրաշարժեր ենք գրանցում նույնիսկ Հայաստանի տարածքում, որ ոչ ոք չի զգում։ Անգամ եթե Ճապոնիայում է գրանցվում հզոր երկրաշարժ մենք գրանցում ենք, բայց դա չի նշանակում, թե մենք դա զգացել ենք»,– պարզաբանեց Մարգարյանը։
Ինչ վերաբերում է հարևան Իրանի տարածքում գրանցված երկրաշարժին, որը պաշտոնական հաղորդագրության համաձայն 4.9 բալ ուժգնություն է ունեցել, Հայաստանի սեյսմիկ կայաններն այն ևս արձանագրել են։
«Մեր դիտացանցը գրանցում է ամեն ինչ։ Մենք ընդհանրապես աշխարհի ցանկացած կետում, Հայաստանից ցանկացած հեռավորության վրա գտնվող ուժեղ երկրաշարժերը գրանցում ենք։ Իրանում տեղի ունեցած երկրաշարժը ևս գրանցվել է` 2.5 մագնիտուդ ուժգնությամբ»,– ասաց Մարգարյանը։
Հիշեցնենք` անցած գիշերը Իրանում 4,9 և 4,5 բալ ուժգնությամբ երկրաշարժեր են գրանցվել` «Բուշեհր» ատոմակայանից ոչ հեռու, Բորազջան քաղաքից 10 կիլոմետր հարավ-արևելք։
«Շատ ցավալի է Իրանում ուկրաինական ինքնաթիռի կործանման լուրը». Մնացականյան
Բորազջան քաղաքը գտնվում է Իրանի հարավ–արևմտյան հատվածում` Պարսից ծոցին հարակից հատվածում։