Թուրքական զինուժը չի եկել Սիրիայի կառավարության հրավերով, հետևաբար պետք է միանշանակ դուրս գա ներխուժած տարածքից: Sputnik Արմենիայի եթերում ասում է արաբագետ Սարգիս Գրիգորյանը։
«Բայց թե ինչպես կլուծվի այդ հատվածի կարգավիճակի հարցը, դեռ անհայտ է: Ամեն դեպքում Թուրքիան փորձում է ուժեղացնել իր ազդեցությունը թե՛ փախստականների հետ գաղափարական աշխատանքի արդյունքում, թե՛ նշված հատվածում թուրքական լեզուն և մշակույթը բերելու շնորհիվ»,- նշում է արաբագետը:
Գրիգորյանի տեղեկացմամբ՝ բնակչության հետ կոնկրետ աշխատանքներ են տարվում, ինչն ակնառու է նաև Սիրիայի մյուս հատվածում, որտեղ թուրքերն անհամեմատ ավելի երկար ժամանակ են տեղակայվել: Խոսքը Աֆրինի մասին է:
Ըստ Գրիգորյանի՝ տարածվում էին նույնիսկ այնպիսի տեղեկություններ, որ Թուրքիան ցանկացել է Աֆրինը պատով առանձնացնել Սիրիայից:
Արաբագետի դիտարկմամբ՝ եթե թուրքերը հայտարարում են, որ Քրդստանի բանվորական կուսակցությունը՝ PKK-ն, որի ճյուղավորումը գործում է Սիրիայի հյուսիսում, ահաբեկչական է, հետևաբար իրենց մոտիվացիան հիմնավորում և արդարացնում են այն հանգամանքով, որ անվտանգության գոտիների ստեղծմամբ կփորձեն կանխել ահաբեկչական կառույցների ներգրավվածությունն ու ակտիվությունը Սիրիայի հյուսիսային վիճահարույց տարածքներում, որպեսզի հետագայում Թուրքիայից այդտեղ բերեն սիրիացի փախստականներին:
Պետրոսյան. «Թուրքոմանական խմբավորումները Սիրիայում կտեղափոխվեն այլ հատվածներ»