ԵՐԵՎԱՆ, 5 հունվարի – Sputnik. ՀՀ վարչապետ Նիկոլ Փաշինյանը մի խումբ երիտասարդների հետ բարձրանում է Գեղարքունիքի մարզի Արտանիշ լեռը`ի նշան տարածաշրջանային խաղաղության։ Այս մասին ՀՀ վարչապետը հայտնեց Facebook-ի իր էջում` ուղիղ եթերի ժամանակ։
«Սա իմ և երիտասարդների խաղաղության կոչն է տարածաշրջանին։ Ինչպես գիտեք և՛ Իրանը, և՛ ԱՄՆ–ն մեզ համար բարեկամ երկրներ են, և այս իրավիճակում մենք չենք կարող ներքաշվել հակաիրանական կամ հակաամերիկյան գործողությունների մեջ։ Մեր ուղերձն այն է, որ Իրանի և ԱՄՆ–ի մեր գործընկերները զերծ մնան այնպիսի քայլերից, որոնք կվատթարացնեն առանց այն էլ լարված իրավիճակը տարածաշրջանում։ Հայաստանի համապատասխան կառույցներին բոլոր հանձնարարականները տրված են, որպեսզի նրանք ուշի–ուշով հետևեն իրավիճակին և մեր մատը պահեն զարկերակին»,- նշեց նա։
«Սա սպառնալիք է ազգային անվտանգության համար». Փաշինյանը` հակահայկական լուրերի մասին
Վարչապետի խոսքով` այսօր տեղի է ունեցել նաև ՀՀ և Իրանի արտգործնախարարների հեռախոսազրույցը:
Նիկոլ Փաշինյանին ուղեկցում է նաև Շրջակա միջավայրի նախարար Էրիկ Գրիգորյանը։
«Մա՛հ Ամերիկային». Իրանում հրաժեշտ են տալիս գեներալ Ղասեմ Սոլեյմանին
Հիշեցնենք` Իրանի և ԱՄՆ հարաբերությունները սրվել են Իրանի Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սոլեյմանիի սպանությունից հետո։ Ղասեմ Սոլեյմանին սպանվել է հունվարի 3-ին Բաղդադում` հրթիռակոծության հետևանքով։ Նրա մարմինը տեղափոխվել է Իրան։ Գեներալին հրաժեշտ տալու են եկել միլիոնավոր իրանցիներ, որոնք բարձրախոսներով բացականչում են` մա՛հ Ամերիկային։ Ղասեմ Սոլեյմանին կհուղարկավորեն հունվարի 7-ին Քերմանում: