ԵՐԵՎԱՆ, 4 հունվարի — Sputnik. Գեներալ Ղասեմ Սոլեյմանիին սպանելով՝ ԱՄՆ-ն խոշորագույն հանցանքն է գործել իրանական ժողովրդի դեմ։ Այս մասին ասել է Իրանի նախագահ Հասան Ռոհանին։
Ինչպես արդեն հայտնել էինք, Բաղդադի մոտակայքում սպանվել է Իսլամական հեղափոխության պահապանների կորպուսի (ԻՀՊԿ) «Կուդս» հատուկ ստորաբաժանման հրամանատար, ԻԻՀ գեներալ Ղասեմ Սոլեյմանին։
Իրանի նախագահի մամուլի ծառայությունը հայտնում է, որ այսօր Ռոհանին այցելել է սպանված գեներալ Ղասեմ Սոլեյմանիի ընտանիքին՝ անձամբ ցավակցություն հայտնելու համար։
Ռոհանիի խոսքով՝ այսօր Սոլեյմանիի մահվան համար ցավում են ոչ միայն Իրանի բնակիչները, այլև աշխարհի բոլոր ազատասեր մուսուլմանական ժողովուրդները։
«Նա ոչ միայն ռազմական հրամանատար էր ու կարևորագույն գործողությունների ճարտարապետ, այլև բացառապես տաղանդավոր քաղաքական գործիչ ու ռազմավար», - ասել է Ռոհանին։
Նա նշել է, որ Իրանի ժողովուրդը երբեք չի մոռանա Սոլեյմաննիի ներդրումը ոչ միայն Իրանի, այլև Լիբանանի և այլ երկրների անվտանգության ապահովման գործում։
Իրանի նախագահն ասել է, որ գեներալի անունը հավերժ կմնա իրանցիների հիշողության մեջ։ Նրա խոսքով՝ «ԱՄՆ-ի արարքը պատմության մեջ կմտնի որպես իրանական ժողովրդի դեմ գործած մեծագույն հանցանք»։
«Ամերիկացիները չհասկացան՝ ինչ լուրջ սխալ գործեցին։ Նրանք կբախվեն այդ հանցավոր գործողության հետևանքների հետ ոչ միայն հիմա, այլև առաջիկա տարիներին», - վստահեցրել է Իրանի առաջնորդը։
Ռոհանիի խոսքով՝ այժմ իրանցիներն ու իրաքցիներն էլ ավելի են ատում ԱՄՆ—ին և իրենց իրավունք են վերապահում վրեժ լուծել Սոլեյմանիի սպանության համար։
Հիշեցնենք` դեկտեմբերի 29-ին ԱՄՆ օդուժը Սիրիայում և Իրաքում ռազմական գործողություններ էր իրականացրել, որոնց հետևանքով սպանվել էին Իսլամական հեղափոխության պահապանների կորպուսի առնվազն 25 անդամ։
ՀՀ ԶՈւ ղեկավար կազմը խորհրդակցություն է անցկացրել. սահմանին իրավիճակը կայուն է
Դեկտեմբերի 31-ին հազարավոր զայրացած իրաքցիներ հարձակվել էին Բաղդադում ԱՄՆ դեսպանատան վրա, ջարդել դեսպանատան դարպասն ու ներխուժել համալիր: Հնչել էին կրակոցներ: Իրաքի ոստիկանները ստիպված էին եղել արցունքաբեր գազ կիրառել: ԱՄՆ դեսպանատան աշխատողներին տարհանել էին դեսպանատան համալիրից և տեղափոխել այլ ապահով վայր: