ԵՐԵՎԱՆ, 3 հունվարի — Sputnik. ԱՄՆ նախագահ Դոնալդ Թրամփի անձնական կարգադրությամբ Իրաքում իրականացված ռազմական գործողության հետևանքով հունվարի 3-ին Բաղդադում սպանվել է ԻԻՀ պատմության մեջ ամենաազդեցիկ մարդկանցից մեկը՝ գեներալ-մայոր Ղասեմ Սոլեյմանին։
Իրանն այս առիթով ԱՄՆ-ին արդեն դաժան վրեժ է խոստացել։ Իրանի արտաքին գործերի նախարար Մոհամմադ Ջավադ Զարիֆը, Twitter–ում մեկնաբանելով Իրաքում ԱՄՆ գործողությունը, այն անվանել է ԱՄՆ-ի կողմից «միջազգային ահաբեկչական ակտ» և «հիմար էսկալացիա»:
Նա նաև ընդգծել է, որ ԱՄՆ-ն պատասխանատվություն է կրելու իրանցի հրամանատարի սպանության համար։
Հունվարի 3-ին ԱՄՆ–ն հրթիռային հարված է հասցրել Բաղդադի օդանավակայանին, ինչի հետևանքով էլ սպանվել է Իսլամական հեղափոխության պահապանների կորպուսի հատուկ նշանակության ուժերի հրամանատար Ղասեմ Սոլեյմանին։
Պենտագոնը պաշտոնապես հայտարարել է, որ այդ ռազմական գործողությունն իրականացվել է ԱՄՆ նախագահ Դոնալդ Թրամփի կարգադրությամբ` «արտերկրում ԱՄՆ անձնակազմի պաշտպանության նպատակով»։
Հիշեցնենք` դեկտեմբերի 29-ին ԱՄՆ օդուժը Սիրիայում և Իրաքում ռազմական գործողություններ էր իրականացրել, որոնց հետևանքով սպանվել էին Իսլամական հեղափոխության պահապանների կորպուսի առնվազն 25 անդամներ։
Սիրիական բանակի ՀՕՊ ուժերը հետ են մղել Դամասկոսի ուղղությամբ հրթիռային հարձակումը
Դեկտեմբերի 31-ին հազարավոր զայրացած իրաքցիներ հարձակվել էին Բաղդադում ԱՄՆ դեսպանատան վրա, ջարդել դեսպանատան դարպասն ու ներխուժել համալիր: Հնչել էին կրակոցներ:
Իրաքի ոստիկանները ստիպված էին եղել արցունքաբեր գազ կիրառել: ԱՄՆ դեսպանատան աշխատողներին տարհանել էին դեսպանատան համալիրից և տեղափոխել այլ ապահով վայր:
Ադրբեջանը կարող է հենակետ դառնալ Սիրիայում հենարանը կորցնող իսլամիստների համար. Փաշինյան