Հայտարարության համաձայն` Արցախում մուտքային զանգերն այսօրվանից կհաշվարկվեն 15 դրամ/րոպե, ելքային զանգերը` 29 դրամ/րոպե սակագնով։ Բայց այս սակագները տոնական են ու կգործեն միայն մինչև 2020թ–ի հունվարի 7-ը։
Նշենք, որ ոչ տոնական օրերին այս օպերատորի սակագները մուտքային զանգերի դեպքում 25 դրամ/րոպե են, ելքայինի համար` 38։
Նույն սակագներով են գործում նաև Ucom–ն ու ՎիվաՍել-ՄՏՍ–ը։ Այս օպերատորները տոնական հատուկ առաջարկ այս պահին չունեն։
Հիշեցնենք` ՀՀ բարձր տեխնոլոգիական նախարար Հակոբ Արշակյանը լրագրողների հետ տարեվերջյան հանդիպմանը հայտնել էր, որ 2020թ–ի հուլիսի 1-ից Արցախի հետ ռոումինգ ծառայությունների սակագները դարձյալ վերանայվելու են։
Վերջին անգամ դրանք փոփոխվել են 2019թ–ի օգոստոսի 1-ին` նվազելով 11-14 տոկոսով։
ՀՀ վարչապետ Նիկոլ Փաշինյանն էլ խոստացել էր, որ հաջորդ նվազեցումը տեղի կունենա 2020 թվականի հունվարի 1-ից` կիսամյակային պարբերականությամբ մինչև 2021 թվականի հունվարի 1-ը։ Նրա խոսքով` այդ գործընթացի վերջնական նպատակը Հայաստանում և Արցախում սակագնային միասնական համակարգ ունենալն է։