ԵՐԵՎԱՆ, 27 դեկտեմբերի - Sputnik. Սահմանադրագետ Արամ Վարդևանյանը կարծում է, որ Սահմանադրական դատարանի նախագահ Հրայր Թովմասյանի հացաքննությունը խիստ մտահոգիչ է, քանի որ այն իր մեջ քրեական հետապնդման տարրեր է պարունակում մեկի հանդեպ, որն անձեռնմխելի է։ Վարդևանյանը, որն այս պահին ՍԴ բակում է ի աջակցություն Թովմասյանի` նման կարծիք հայտնեց լրագրողների հետ զրույցում։
Երեկ հայտնի էր դարձել, որ Թովմասյանն այսօր հարցաքննության կենթարկվի Հատուկ քննչական ծառայությունում։
«Գտնում եմ, որ առնվազն անձեռնմխելիության հետ կապված խնդիր կա, նման քննարկում չի եղել։ Այսօր ականատես ենք լինում, որ Սահմանադրական դատարանի դատավորների նկատմամբ երաշխիքները չեն պահպանվում։ Եվրոպական երկրներում քանի՞ դեպք գիտեք, որ ՍԴ մուտք են գործում ՀՔԾ և ԱԱԾ ներկայացուցիչներ. ՍԴ–ն վերիշխանական մարմին է»,–ասաց Վարդևանյանը։
Սահմանադրագետը նշեց, որ տարօրինակ է` ՍԴ դատավորներին վաղ կենսաթոշակի գնալ են առաջարկում «կամավորության» սկզբունքով ու ժամկետ դնում նրանց առաջ։ Ըստ Վարդևանյանի` եթե ինչ–որ բան կամավոր է, ուրեմն կամավոր է՝ առանց ժամկետների:
Նշենք, որ ԱԺ–ն «Սահմանադրական դատարանի մասին» օրենքում փոփոխություններ կատարելով` առաջարկում է ՍԴ գործող դատավորներին մինչ կենսաթոշակային տարիքը լրանալն անցնել կենսաթոշակի ու դրա դիմաց առաջարկում է բարձր կենսաթոշակ` ներկայիս աշխատավարձերի չափով (ավելի քան 1 մլն դրամ)։
Հիշեցնենք` 2019թ.–ի հոկտեմբերի 17-ին ՀՔԾ–ն հայտնեց, որ ՀՀ ԱԺ պատգամավոր Արման Բաբաջանյանը ՀՀ գլխավոր դատախազին հաղորդում է ներկայացրել այն մասին, որ մի խումբ պաշտոնատար անձինք յուրացրել են իշխանությունը։
Կառավարությունը թոշակի է ուղարկում Հրայր Թովմասյանին
Հաղորդման հիման վրա ՀՀ հատուկ քննչական ծառայությունում նախապատրաստված նյութերով որոշում է կայացվել ՀՀ քրեական օրենսգրքի 300-րդ հոդվածի 1-ին մասով (այն է` իշխանությունը զավթելը` բռնություն գործադրելու կամ բռնություն գործադրելու սպառնալիքի միջոցով, ինչպես նաև Սահմանադրությամբ չնախատեսված այլ եղանակով Հանրապետության Նախագահի, Ազգային ժողովի, կառավարության կամ սահմանադրական դատարանի լիազորություններին տիրանալը) քրեական գործ հարուցելու մասին: Բաբաջանյանի հայտարարությունը վերաբերում է ՍԴ նախագահ Հրայր Թովմասյանին:
Թանկարժեք ճգնաժամ. Թովմասյանին ու ՍԴ դատավորներին որքան գումարի դիմաց կուղարկեն թոշակի