ԵՐԵՎԱՆ, 23 դեկտեմբերի — Sputnik. Ռազմատեխնիկական զարգացման ուղղությունների ցուցակը, ըստ որոնց ամերիկյան պրոֆեսիոնալներն ընդունում են Ռուսաստանից իրենց երկրի հետ մնալը, համալրվել է ևս մեկ կետով։ Ինչպես հայտնի է, Միացյալ Նահանգների զինծառայողներին և փորձագետներին հատկապես անհանգստացնում են այնպիսի թեմաներ, ինչպիսիք են ռադիոէլեկտրոնային պայքարի միջոցները, հակաօդային պաշտպանությունը, գերձայնային զենքը, տանկաշինությունը և նույնիսկ տիեզերքը։
Մենք ականատես ենք լինում ամենահետաքրքիր և հայտնի առասպելներից մեկի կործանմանը, որոնք ծնվել են ԱՄՆ–ի բացարձակ գերիշխանության նախորդ շրջանում։ Այդ ժամանակ աշխարհի ահռելի մասն անկեղծորեն համոզված էր, որ նման իրադրությունը կպահպանվի ընդմիշտ` աշխարհի վրա ամերիկացիների վիթխարի գերազանցության պատճառով։ Ընդ որում` առանցքային էին համարվում գիտատեխնիկական (և որպես կանոն` ռազմատեխնիկական) ոլորտի ձեռքբերումները։
Պետք է խոստովանել, որ այդ պահին` 15-20 տարի առաջ, նման տեսակետը բավական տրամաբանական էր։
Խիստ առաջադեմ և հարուստ ԱՄՆ–ն հսկայական միջոցներ է ներդրել գիտության մեջ` ներառյալ աշխարհով մեկ «ուղեղներ» գնելը և, որպես հետևանք, նորագույն ձեռքբերումների հիման վրա ռազմական մշակումները։
Պատասխան «Իսկանդերին». ինչո՞վ են աշխարհին սպառնում ԱՄՆ նոր հրթիռները
Կարելի է հասկանալ, թե ինչու են նման պայմաններում շատերը որոշել, որ այժմ Վաշինգտոնի առավելությունն անհաղթահարելի է և հավերժ։ Ամենահետաքրքիրն այն է, որ դրան հավատացել են հենց ամերիկացիները` փորձագետները և բարձրաստիճան պաշտոնյաները` այդ համոզմունքի վրա կառուցելով սեփական պետության քաղաքականությունը։
RAND Corporation–ը գրում է հրետանու հետ կապված այսօրվա խնդիրների պատճառների մասին. 2000–ական թվականների սկզբից ամերիկյան զինվորականները կենտրոնացել են ապստամբների դեմ պայքարի վրա, ուստի նրանց համար գլխավոր ուժը դարձել է ավիացիան։
Պենտագոնի և ՆԱՏՕ–ի համար վերջին տասնամյակների սովորական մարտական գործողությունների ձևաչափը լավ հայտնի է.
1. գնդակոծել հերթական վտարանդի երկրի ռազմական («ձեռքի հետ» նաև քաղաքացիական) ենթակառուցվածքը և խոշոր բանակային խմբավորումները,
2. այնուհետև օդային գրոհներով կամ ոչ մեծ ցամաքային գործողություններով (կրկին ուղղաթիռների և ինքնաթիռների աջակցությամբ) ոչնչացնել դիմադրության մնացած օջախները` ի դեմս հետամնաց բնիկների, որոնք վազում են «Կալաշնիկով» հրացաններով։
Սակայն նման մոտեցումը հիմա տհաճ հետևանքներ ունի։ Մասնավորապես, անդրօվկիանոսյան փորձագետները փաստում են, որ իրենց հրետանու արդյունավետությունը նվազել է և զիջում է ռուսականին։ Դա տեղի է ունեցել ամերիկյան հրետանավորների փորձի զգալի կրճատման և Մոսկվայի կողմից ժամանակակից հրետանային միջոցները զարգացնելու պատճառով` ներառյալ հզոր հաուբիցները, համազարկային կրակի ռեակտիվ համակարգերը և բալիստիկ հրթիռները։
Կրկին հաստատվել է, որ իրականում հավերժ ոչինչ չկա, և նույնիսկ ամենահզոր կայսրությունն ընդունակ չէ ընդմիշտ մնալ բարձունքին, այդ թվում` ռազմական ոլորտում։
Ստեղծված կարծրատիպը կոտրվել է տարբեր կողմերից։ Կա Չինաստանի օրինակը, որն օգտվել է «համաշխարհային հավաքման արտադրամասի» կարգավիճակից` սեփական գիտական, տեխնոլոգիական և ռազմատեխնիկական դպրոցները զարգացնելու համար։ Կա Մոսկվայի օրինակը, որը նախընտրել է շեշտը դնել որոշ ռազմավարական շրջաններում կետային առաջընթացի վրա, և դա արդարացրել է իրեն. Ռուսաստանը համաշխարհային առաջատար է դարձել համապատասխան ուղղություններում։ Ի վերջո, կա Հյուսիսային Կորեան, որի ջանքերը հրթիռաշինության մեջ տարիներ շարունակ ծաղրուծանակի առարկա են եղել, մինչև հանկարծ չի պարզվել, որ Փհենյանի մոտ ստացվել է։ Այժմ ոչ ոք չի ուզում ծիծաղել, հատկապես ճապոնացիները և ամերիկացիները։
Սառը պատերազմի շեմին. ԱՄՆ–ն արգելված հրթիռ է փորձարկել. տեսանյութ
Անշուշտ, ԱՄՆ ռազմական փորձագետների խուճապի հետևում կանգնած է Պենտագոնը, որը հետաքրքրված է սպառազինությունների մշակմանը տրամադրվող բյուջեի և միջոցների ավելացմամբ։ Սական դա չի նշանակում, որ ամերիկյան ռազմական մեքենայի թուլությունները փաստող մասնագետները ճիշտ չեն։