ԵՐԵՎԱՆ, 19 դեկտեմբերի– Sputnik. ՀՀ երկրորդ նախագահ Ռոբերտ Քոչարյանի որդին` Լևոն Քոչարյանը, չի ուզում շտապել, բայց նաև չի բացառում, որ ոստիկանության` այսօր տարածած տեսանյութը ամիսներ առաջ պլանավորած օպերացիա էր:
«Սա իշխանությունների ընտրած ճանապարհն է և այս «աննախադեպ բացահայտումը» հատուկ արվում է այն ժամանակ, երբ դատավորը խորհրդակցական սենյակում է»,–«Հրապարակին» ասել է Լևոն Քոչարյանը։
Նա նշել է, որ տեսանյութից հասկացել է, թե ով է այդ աջակիցը: Քոչարյանի որդու խոսքով` նա որպես աջակից հայտնվել է մոտ 3 ամիս առաջ, և պատրաստակամություն է հայտնել իր ընկերների և համախոհների հետ միասին պայքարելու «այս անարդարության դեմ»:
«Ուրեմն մենք մանկուրտների երկիր ենք». Քոչարյանի խոսքն իրարանցում առաջացրեց դատարանում
«Եթե տեսանյութի պարունակությունը իրականություն է, ապա սա չափազանց մտահոգիչ է: Մեր ընտանիքի որևէ անդամ երբևէ որևէ մեկի միջոցով` ներառյալ այդ տղայի, չի փորձել և նպատակ չունի փոխել որևէ ցուցմունք: Ինչպես հայրս է հայտարարել՝ չկա ցուցմունք, որը մենք կուզեինք չլիներ կամ փոխվեր: Ես խստագույնս դատապարտում եմ և հորդորում իրենց մեր աջակիցը համարողներին, մեզ նման «արջի» ծառայություններ չփորձել մատուցել»,–ասել է Լևոն Քոչարյանը:
Առաջարկում ենք փոխել Քոչարյանի խափանման միջոցը. մշակույթի գործիչների հայտարարությունը
Հիշեցնենք, որ այսօր ՀՀ ոստիկանությունը տեսանյութ տարածեց, որտեղ ասվում էր, թե Մարտի 1–ի գործով ամբաստանյալ, երկրորդ նախագահ Ռոբերտ Քոչարյանի աջակիցներից մեկը իր գրասենյակում գործով տուժողներից մեկին առաջարկում է հրաժարվել իր տված ցուցմունքից՝ նշելով, որ դրա դիմաց պատրաստ են այնքան գումար տալ, որքան առաջարկում է պետությունը, գումարած` բարձր պաշտոն հետագայում։
Նշենք, որ վաղը` դեկտեմբերի 20–ին, Վերաքննիչ քրեական դատարանը դատավոր Լուսինե Աբգարյանի նախագահությամբ հրապարակելու է Առաջին ատյանի դատարանի կողմից գրավը որպես խափանման միջոց չկիրառելու որոշման դեմ բողոքի վերաբերյալ որոշումը։