ԵՐԵՎԱՆ, 19 դեկտեմբերի — Sputnik. 2018թ.-ի հեղափոխությունից հետո Հայաստանում պետք է ձևավորվեր նոր Հանրային խորհուրդ։ Այսօր կառավարության նիստում ՀԽ նախագահի պաշտոնում Ստյոպա Սաֆարյանի թեկնածությունը հաստատելուց հետո հայտարարեց վարչապետ Նիկոլ Փաշինյանը։
«Հեղափոխությունից հետո, երբ խոսվում էր կադրային ջարդի մասին, ես հայտարարեցի, որ այս նոր պայմաններում յուրաքանչյուրը պետք է ունենա իր շանսը,– ասաց Փաշինյանը,– նոր ՀԽ ձևավորման հարցը ես պատվիրակել եմ գոյություն ունեցող ՀԽ–ին` հաշվի առնելով, որ այնտեղ եղել են մարդիկ, ովքեր կանգնած են եղել Երրորդ հանրապետության ձևավորման ակունքներում։ Ես պատշաճ և պատեհ չեմ համարել, որ, անկախ այդ մարդկանց նկատմամբ իմ ունեցած վերաբերմունքից, օգտագործելով իմ ունեցած իշխանությունը` սկսեմ պաշտոնանկություններ անել։ Ես հույս եմ ունեցել, որ այդ մարդիկ կօգտվեն այդ հնարավորությունից»,– ասաց նա։
Վարչապետը շեշտեց, որ ասվածը ոչ միայն ՀԽ–ին է վերաբերում, այլև ՀՀ այլ շատ կառույցներին։
Առաջարկում ենք փոխել Քոչարյանի խափանման միջոցը. մշակույթի գործիչների հայտարարությունը
«Քաղաքական ուժերում էլ ես նկատում եմ, որ այդ բանը կա` ինձ պաշտոն տուր, թե չէ ասուլիս կանեմ, ինձ պաշտոն տուր, թե չէ ցույց կանեմ, կամ ինձ բիզնեսի ոլորտ տուր, թե չէ կասեմ, թե ինչ վատ բաներ են կատարվում ՀՀ–ում։ Ինչքան էլ այդ մարդիկ ասուլիս անեն, մեջից կիսվեն, 4 մասի բաժանվեն, այդ հարաբերությունները չեն լինելու։ Քաղաքական առևտրի էջը Հայաստանում փակված է»,– ասաց Փաշինյանը։
Առևտրով զբաղված անձանց բնորոշելու համար Փաշինյանը հիշեց հայկական հայտնի ասացվածքն այն մասին, որ խոզի գլուխը ինչքան էլ դնեն գորգի վրա` գլորվելու է, ընկնի ցեխը։
Վարչապետը շոկի մեջ է. Հայաստանում երեխաներ են վաճառվել
«Հիմա բոլոր այն խոզերի գլուխները, որ դրվել են գորգի վրա, գլորվելու են, ընկնեն ցեխի մեջ»,– ասաց Փաշինյանը։
Հիշեցնենք` ՀԽ նախկին նախագահ Վազգեն Մանուկյանը նոյեմբերի 13-ին հրաժարականի դիմում էր ներկայացրել։ Այսօր կառավարության նիստում ընդունված որոշմամբ նրան այդ պաշտոնում փոխարինել է Ստյոպա Սաֆարյանը։