Արցախի հետ ռոումինգ կապը կէժանանա. նախարար

ՀՀ կառավարությունը բջջային կապի օպերատորների հետ պայմանավորվածություն է ձեռք բերել Արցախի հետ ռոումիգ կապի սակագները ևս մեկ անգամ վերանայելու ուղղությամբ։
Sputnik

ԵՐԵՎԱՆ, 18 դեկտեմբերի — Sputnik. 2020թ.–ի հուլիսի 1-ից Արցախի հետ բջջային կապի ռոումինգ ծառայության սակագները դարձյալ կնվազեն։ Այսօր` դեկտեմբերի 18–ին, լրագրողների հետ հանդիպման ժամանակ այս մասին հայտնեց ՀՀ բարձր տեխնոլոգիական նախարար Հակոբ Արշակյանը։

«Ե՛վ ելքային, և՛ մուտքային զանգերի սակագների վերանայում տեղի կունենա, որի մասին հայտարարությունը կարվի ավելի ուշ»,– ասաց նախարարը։

Արցախի հետ կապի սակագների նվազեցման ուղղությամբ իրականացված քայլերը նախարար Արշակյանն արդյունավետ է գնահատում։

«Մենք Հանրային ծառայությունները կարգավորող հանձնաժողովի հետ միասին արդյունավետ աշխատանք ենք ունեցել, և սակագները նվազել են 11-44 տոկոսով թե՛ մուտքային, թե՛ ելքային զանգերի համար»,– ասաց նախարարը` անդրադառնալով 2019թ.–ի ընթացքում արդեն իսկ վերանայված սակագներին։

Տիգրան Սարգսյանն ասել է` որ դեպքում կչեղարկվի ռոումինգը ԵԱՏՄ–ում

Թե որքանով կիջնեն սակագները 2020թ.–ի հուլիսին, Արշակյանը չցանկացավ ասել` պատճառաբանելով, որ բանակցությունները բջջային կապի օպերատորների հետ ընթացքի մեջ են։

«Բայց շատ կիջնեն։ Արցախում տարիներ շարունակ բջջային կապի ոլորտը մենաշնորհային իրավունքով տրված էր բջջային կապի մեկ ընկերության, որի պայմանագրի ժամկետն ավարտվում է 2020թ.–ին։ Դա կբերի նրան, որ այս ոլորտն էլ ավելի կկարգավորվի»,– ասաց նախարարը։

Ռոումինգի և ավտոմոբիլային հաղորդակցության գները կնվազեն. Երևանն ու Մոսկվան պայմանավորվեցին

Հիշեցնենք`  սակագների վերանայում էր իրականացվել 2019թ.–ի օգոստոսի 1-ից։

ՀՀ վարչապետ Նիկոլ Փաշինյանը խոստացել էր, որ հաջորդ նվազեցումը տեղի կունենա 2020 թվականի հունվարի 1-ից` կիսամյակային պարբերականությամբ` մինչև 2021 թվականի հունվարի 1-ը։ Ըստ նրա, այդ գործընթացի վերջնական նպատակը Հայաստանում և Արցախում սակագնային միասնական համակարգ ունենալն է։

Հայաստանում և Արցախում ռոումինգի գինը կնվազի. Փաշինյանը մանրամասներ է հայտնում

Փոստային կապի ոլորտում ևս փոփոխություններ 2019թ.–ին արվել են։

«Ինչպես գիտեք, փոստային կապի ոլորտում կային, այսպես կոչված, միջազգային փաթեթների մաքսային զննման գումարներ` 2250 դրամ, հայտնի որպես «մաքսայինի գումարներ», որոնք չեղարկվել են»,– ասաց Արշակյանը։

Սա, նախարարի խոսքով, արվել է փոքր ու միջին ձեռնարկատերերի համար, ովքեր զբաղվում են արտաքին էլեկտրոնային առևտրով։