ԵՐԵՎԱՆ, 17 դեկտեմբերի — Sputnik. ՀՀ նախկին նախագահ Ռոբերտ Քոչարյանին այսօր դուրս են գրել «Իզմիրլյան» բժշկական կենտրոնից։ Այս մասին Sputnik Արմենիայի հետ զրուցում հայտնեց ԲԿ–ի տնօրեն Արմեն Չարչյանը։
«Քոչարյանն իրեն լավ էր զգում։ Նա վերականգնողական շրջան է անցել»,–ասաց Չարչյանը։
Նրա խոսքով` նախկին նախագահը պետք է մեկուկես ամսից հերթական զննում անցնի «Իզմիրլյան» ԲԿ–ում։
«Հուսով եմ` ապօրինի կալանքը շուտով կվերացվի». Սողոմոնյանը` Քոչարյանի գործի մասին
Ավելի վաղ մամուլում տեղեկություն էր տարածվել, որ Քոչարյանին նորից վիրահատել են (առաջին անգամ նրան հոկտեմբերին էին վիրահատել. ուռուցք էին հեռացրել)։ Սակայն կրկնակի վիրահատության մասին լուրերը չեն հաստատվել։ Այսօր «Իզմիրլյան» ԲԿ–ի տնօրենն ասաց, որ այդ տեղեկությունն անձնական բնույթ է կրում, ու Քոչարյանը չի ուզում այն հրապարակել։
Դատավորը «լայք» է դրել եղբոր գրառումներին. Քոչարյանի փաստաբաններն ինքնաբացարկ պահանջեցին
Արդարադատության նախարարության քրեակատարողական վարչությունից մեզ հետ զրուցում ասացին, որ նախկին նախագահը վերադարձել է «Երևան Կենտրոն» ՔԿՀ։
Հիշեցնենք` «Մարտի 1»-ի գործի շրջանակում Հայաստանի երկրորդ նախագահ Ռոբերտ Քոչարյանին մեղադրանք է առաջադրվել 2018–ի հուլիսի 26-ին ՀՀ քրեական օրենսգրքի 300.1-րդ հոդվածի 1-ին մասով առ այն, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: