ԵՐԵՎԱՆ, 17 դեկտեմբերի – Sputnik. «Լուսավոր Հայաստան» կուսակցության նախագահ, ԱԺ պատգամավոր Էդմոն Մարուքյանը facebook-ի իր էջում հայտնում է, որ քննարկում են Երևանի ավագանու անդամ Դավիթ Խաժակյանի գործունեությունը դադարեցնելու հարցը։
«Տեղեկացնում եմ, որ «Լուսավոր Հայաստան» կուսակցությունն այժմ քննարկում է Երևանի ավագանիում իր միակ անդամին` Դավիթ Խաժակյանին հետ կանչելու և ավագանիում նրա գործունեության շարունակության նպատակահարմարության հարցը»,–գրել է Մարությանը:
Հիշեցնենք, որ երեկ` դեկտեմբերի 16–ին, Երևանի ավագանու հերթական նիստի ժամանակ կրկին սկանդալ եղավ Դավիթ Խաժակյանի մասնակցությամբ։
Խաժակյան. «Պետք է պարզել՝ ինչ ընթացակարգով են շրջանցել ավագանու որոշումը»
«Այսօր ստացել եմ քաղաքապետի կարգադրությունը՝ Հայկ Մարությանին արձակուրդ տրամադրելու մասին, որով լիազորությունները վերապահվում էր նաև քաղաքապետի տեղակալ Հայկ Սարգսյանին: Տեղի է ունեցել պաշտոնեական կեղծիք` հետին ամսաթվով՝ հոկտեմբերի 17-ով լրացվել է փաստաթուղթ, որն իրականում գրվել է նոյեմբերի 4-ին»,–ասաց Խաժակյանը։
Նա հավաստիացրեց, որ իր մոտ է գտնվում իրական, այսինքն` հետին ամսաթվով` նոյեմբերի 4-ով լրացված փաստաթղթի պատճենը։
Խաժակյանը պլանշետի մեջ ուներ իր նշած փաստաթղթի բնօրինակի պատճենը, որը ցույց տվեց ավագանու նիստի մասնակիցներին:
«Բռնվեցի՞ք ժողովուրդ ջան, սա այն փաստաթուղթն է, որը դուք փոխել եք։ Կամ ինձ դատի տվեք զրպարտության համար, կամ թող դատախազությունն ինձնից վերցնի փաստաթղթի այս տարբերակը»,–ասաց նա և հավելեց, որ կարող են փորձաքննության ենթարկել փաստաթղթի իր օրինակը։
Քաղաքապետի խորհրդական Կարեն Համբարձումյանն անմիջապես արձագանքեց «Լույս» խմբակցության ղեկավարի ելույթին։
«Մնում է Դատախազության մեր գործընկերներից ներողություն հայցել պատճառվելիք անհարմարությունների և ժամանակի կորստի համար»,- ասաց Համբարձումյանը:
Ավելի վաղ Խաժակյանը գլխավոր դատախազին հանցագործության մասին հաղորդում էր ներկայացրել, որտեղ, մասնավորապես, նշել էր, որ ս.թ. հոկտեմբերի 22-ից նոյեմբերի 8-ը Հայկ Մարությանը գտնվել է արձակուրդում, որի ժամանակ նրա լիազորությունները զբաղեցրել է քաղաքապետի առաջին տեղակալ, քաղաքապետի պաշտոնակատար Հրաչյա Սարգսյանը, սակայն քաղաքապետի որոշմամբ` Սարգսյանը նոյեմբերի 5-ից 13-ը գործուղվել է արտասահման։ Հրաչյա Սարգսյանին փոխարինել է քաղաքապետի տեղակալ Հայկ Սարգսյանը։ Վերջինս հիշյալ ժամանակահատվածում ավելի քան 7 տասնյակ փաստաթղթեր է ստորագրել` չունենալով այդ լիազորությունները։
Երևանի ավագանու անդամը «լկտի պահվածք» է դրսևորել. Խաչատրյանի բաց նամակը Մարությանին
Հիմք ընդունելով այս ամենը, Խաժակյանը պահանջում է, որ փոխքաղաքապետ Հայկ Սարգսյանն ու Հայկ Մարությանը պատասխանատվության ենթարկվեն` պաշտոնեական լիազորությունները չարաշահելու համար։
Խաժակյանը նաև պատրաստակամություն է հայտնել աջակցել քննությանը և մատնանշել բազմաթիվ այլ հանգամանքներ։