ԵՐԵՎԱՆ, 16 դեկտեմբերի — Sputnik. Պետբյուջեով ֆինանսավորվող ֆիլմերի 45 տոկոսը դեբյուտային նախագծերն են, ինչը փաստում է կինոյի ոլորտի առողջացման մասին: Այս մասին այսօր իր տարեկան ամփոփիչ ասուլիսի ժամանակ ասաց ՀՀ կրթության, գիտության, սպորտի և մշակույթի փոխնախարար Արայիկ Խզմալյանը:
«Ես հուսադրված եմ կինոյի ոլորտի աշխատելաոճով` կինոյի ոլորտի ներկայացուցիչները ոչ թե իրենց հատկացվող ֆինանսավորման ավելացման հարց դրեցին, այլ ինստիտուցիոնալ բարեփոխումների ճանապարհով գնացին ու բարձրացրին օրենքի նախագիծ ունենալու խնդիրը։ Այժմ Կինոյի մասին օրենքի երկու նախագիծ կա, որոնք պետք է համադրել ու մեկ փաթեթով մտնել Ազգային ժողով»,–ասաց փոխնախարարը։
Խզմալյանի խոսքով` կինոգործիչների ընտրած ճանապարհը պետք է օրինակելի լինի մյուս ոլորտի ներկայացուցիչների համար։
Փոխնախարարը նշեց նաև, որ հաջորդ տարի թվայնացման մասնագետներ կհյուրընկալվեն Հայաստանում. նրա խոսքով` Հայաստանը պետք է մշակի կինոժառանգության պահպանման ու դրա հանրայնացման ծրագիր։
Oպերայի նախկին տնօրեն Կոնստանտին Օրբելյանը խարդախության զոհ է դարձել
Հարցին, թե ինչ է լինելու «Հայֆիլմի» ճակատագիրը` Խզմալյանը պատասխանեց, որ այն չի կարող ունենալ այն անցյալը, որն ունեցել է։
«Աշխարհը վաղուց այլ ճանապարհով է գնում և պետությունը չի զբաղվում կինոարտադրությամբ։ «Հայֆիլմի» շենքն ու տարածքը պետք է առանձնացնենք «Հայֆիլմ» բրենդից»,–ասաց Խզմալյանը։
Մեկ այլ հարցի, թե հնարավո՞ր է ընկերության տարածքը սեփականաշնորհվի ու ոչ ֆիլմարտադրության համար օգտագործվի` Խզմալյանը պատասխանեց, որ ամեն ինչ հնարավոր է։
Հիշեցնենք, որ մարտի 21–ին կառավարության նիստի ժամանակ ՀՀ տնտեսական զարգացման և ներդրումների նախարարության առաջարկով «Համո Բեկնազարյանի անվան «Հայֆիլմ» կինոստուդիան» վարձակալության հանձնվեց «Կինոկետ Փրոդաքշնս» սահմանափակ պատասխանատվությամբ ընկերությանը: «Կինոկետ Փրոդաքշնսը» պայմանագրով պարտավորվում է նաև «Հայֆիլմ» կինոստուդիայում իրականացնել բացառապես կինոարտադրական գործունեություն:
«Հայֆիլմը» սեփականաշնորհել են 2003-2004 թվականներին։ Այն վաճառել էին «CS Media city» հոլդինգի մաս կազմող «Armenia Studios» ընկերությանը։ Ստուդիայի նոր տերերը, պայմանագրի համաձայն, պարտավորվել էին 10 տարվա ընթացքում 70 մլն դոլար ներդնել։ Ենթադրվում էր, որ տարեկան 4 գեղարվեստական, 3 մուլտիպլիկացիոն և 5 կարճամետրաժ ֆիլմ պետք է նկարահանվեր։
Սակայն գրեթե 10 տարում ոչ մի ֆիլմ չնկարահանվեց։ Այս տարիների ընթացքում շենքն անպետք դարձավ, նույնիսկ կահույքն ու սարքավորումները դուրս հանեցին։
«Ինձ ազատելուց հետո հովանավորները դադարել են օգնել թատրոնին». Կոնստանտին Օրբելյան
2015 թվականի ամռանը ստուդիան վերադարձրեցին պետությանը, քանի որ սեփականատերերը 10 տարվա ընթացքում խոստացած ներդրումները չկատարեցին, ինչպես նաև չկատարեցին ֆիլմերի թվայնացման հետ կապված իրենց պարտավորությունները։ Սակայն դրանից հետո էլ «Հայֆիլմի» ճակատագիրը չփոխվեց։