ԵՐԵՎԱՆ, 13 դեկտեմբերի — Sputnik. ՀՀ ԱԱԾ նախկին տնօրեն Արթուր Վանեցյանը թույլ չի տալու, որ կեղծ իրավապաշտպանները, արտաքին օրակարգեր սպասարկող անձինք, նրանց ստեղծած ցանցերը որևէ կերպ վնասեն Հայաստանի անվտանգությանը։ Այս մասին Վանեցյանն ասել է «Ժողովուրդ» օրաթերթի հետ զրույցում` մեկնաբանելով որոշ հասարակական գործիչների կողմից ԱԱԾ-ի ուղղությամբ վերջին օրերին ուժեղացած հարձակումները:
«Եթե ԱԱԾ-ն սահմանափակված է պաշտոնեական էթիկայով, չի նշանակում, որ ում մտքով ինչ դատարկաբանություն անցնի պետք է հրապարակավ հնչեցնի սպաների հասցեին: ԱԱԾ գործող սպաներն այսօր սահմանափակված են պաշտոնեական էթիկայով, ես՝ այլևս ոչ»,–ասել է Վանեցյանը։
Նա նաև հայտնել է, որ անկախ իր կարգավիճակից, մշտապես լինելու է ծառայակից ընկերների կողքին։ Վանեցյանի խոսքով` ամեն ինչ անելու է, որպեսզի հասարակությունը զերծ մնա նրանց վտանգավոր քարոզչության ազդեցությունից։ «Սա մեր տունն է, մեր հայրենիքն է»,-ասել է ԱԱԾ նախկին տնօրենը։
«Ժողովրդի» հարցին՝ ինչպես է գնահատում ԱԱԾ ներկայիս գործունեությունը, Վանեցյանը պատասխանել է, որ ՀՀ ազգային անվտանգության ծառայությունը շարունակում է պատվով լուծել իր առջև դրված խնդիրները։ Ըստ նրա` չնայած ներքին և արտաքին վայրիվերումներին՝ ԱԱԾ-ն այսօր էլ այն կառույցն է, որն իր ուսերին է կրում հայկական պետությունների և ողջ ժողովրդի անվտանգությունն ապահովելու չափազանց ծանր ու պատասխանատու բեռը։ «Այնտեղ ծառայում են լավագույնները, ովքեր անձնուրաց ու պատվով դիմակայում են բոլոր ներքին ու արտաքին մարտահրավերներին»,–նշել է Վանեցյանը։
Հիշեցնենք, որ իրավապաշտպան Արթուր Սաքունցը դեկտեմբերի 7-ին արած իր գրառման մեջ անդրադարձել էր ԱԱԾ–ի պաշտոնատար անձանց` ԱԱԾ-ի պետի պաշտոնակատարին հորդորելով, որ կոռուպցիայի դեմ պայքարի տրամաբանության շրջանակներում մեկ առ մեկ հրապարակեն ծառայության տարբեր պետերի, նրանց կապակցված անձանց անուններով, նրանց կողմից փաստացի տիրապետվող գույքերի, սեփականության մասին տեղեկությունը։
ՔԿ-ն հերքում է. Վանեցյան–Խաչատրյան սկանդալային գաղտնալսման գործով որևէ անձ չի ձերբակալվել
«Կամ Ձեր այդ ամբողջ ոհմակի վերաբերյալ տվյալները հավաքում և հրապարակում եք, հակառակ դեպքում մենք ենք հրապարակելու, ու շատ վատ պատկեր կունենաք»,–սպառնացել էր Սաքունցը։
Նա նաև ԱԱԾ-ի պետի պաշտոնակատարին հորդորել էր վերջ տալ իրենց մտերիմներին պաշտոններին նշանակելու պրակտիկային և զբաղվել գործով։
«Երբ հեղափոխությունը դատարկ մի պղպջակ է». Վանեցյանը կրկնել է կաթողիկոսի խոսքը
Դեկտեմբերի 10–ին ԱԱԾ–ն հայտարարություն էր տարածել` ասելով, որ Սաքունցը ֆեյսբուքյան իր էջում անպատեհ ցասումի պոռթկմամբ հրապարակած գրառմամբ անցել է թույլատրելիի բոլոր հնարավոր սահմանները։ Ըստ ԱԱԾ–ի` Սաքունցը, մի կողմից, ՀՀ ազգային անվտանգության ծառայության ու դրա աշխատակիցների վերաբերյալ օգտագործել է պատիվն ու արժանապատվությունը վիրավորող և զրպարտչական բնույթի արտահայտություններ, իսկ մյուս կողմից, մոլորեցնելով հասարակության լայն շերտերին, իրականությանը չհամապատասխանող, առանձին փաստերի վերաբերյալ ապատեղեկատվություն է ներկայացրել: