ԵՐԵՎԱՆ, 13 դեկտեմբերի — Sputnik. ՀՀ վարչապետ Նիկոլ Փաշինյանը ներողություն է խնդրել Նար–Դոսից։ Այս մասին նա գրառում է արել Facebook–ի իր էջում։
«Պաշտոնապես ներողություն եմ խնդրում Նար-Դոսից իր հրաշալի պատմվածքը Թումանյանին վերագրելու համար»,–գրել է նա։
Փաշինյանի խոսքով` մնացած մասով ամեն ինչ ճիշտ է. կանանց և երեխաներին նկատմամբ բռնության արդարացման որևէ փորձ ապազգային գործունեություն է, Հայաստանը միջնադարյան խավարի երկիր ունենալու անիրագործելի երազանք: «Թույլ չենք տա»,–իր գրառումն ամփոփել է նա։
Հիշեցնենք, որ երեկ կառավարության նիստում քննարկվում էր «ՀՀ քրեական օրենսգրքում լրացում կատարելու մասին» և «ՀՀ քրեական դատավարության օրենսգրքում լրացում կատարելու մասին» ՀՀ օրենքների նախագծերի փաթեթին հավանություն տալու մասին հարցը։ Վարչապետը նշեց, որ այն շատ կարևոր և սկզբունքային նախագիծ է, որը բխում է 2018–ին տեղի ունեցած թավշյա հեղափոխության տրամաբանությունից։ «Մենք խնդիր ենք մեր առաջ դրել, որ Հայաստանը պետք է լինի բռնությունից զերծ հանրություն։ Հարցի քննարկման համատեքստում հիշեցի Հովհաննես Թումանյանի հայտնի պատմվածքը՝ «Թե ինչ եղավ հետո, երբ շաքարամանից երկու կտոր շաքար պակասեց»։ Կարծում եմ՝ շատ կոնկրետ բան ենք ասում, ՀՀ որևէ քաղաքացի չպետք է ենթարկվի բռնության»,–ասել էր Փաշինյանը` Նար–Դոսի պատմվածքը վերագրելով Թումանյանին։
Քննարկման արդյունքում կառավարությունը կողմ էր քվեարկել ներկայացված նախագծին։ Այն կներկայացվի ԱԺ։