ԵՐԵՎԱՆ, 12 դեկտեմբերի — Sputnik. ՀՀ վարչապետ Նիկոլ Փաշինյանի այսօրվա հայտարարությունից հետո պետական համակարգում փոփոխությունները բացառված չեն։ Այսօր լրագրողների հետ զրույցում ասաց վարչապետի աշխատակազմի ղեկավար Էդուարդ Աղաջանյանը` անդրադառնալով կառավարության նիստում Փաշինյանի հնչեցրած հայտարարություններին։
«Պետական համակարգում պարբերաբար բավականին հնչեղ փոփոխություններ են լինում, և ոչ մի բան բացառված չէ։ Բայց կարծում եմ` պետք չէ վարչապետի հայտարարությունների մեջ որևէ բան փնտրել»,– ասաց նա։
Հիշեցնենք` կառավարության այսօրվա նիստում ՀՀ վարչապետ Փաշինյանը հայտարարել էր, որ հայաստանյան պետական համակարգն ընդդիմանում է հեղափոխությանը։ Նրա խոսքով` Հայաստանում գրանցված տնտեսական բոլոր ցուցանիշներն արվել են ի հեճուկս ՀՀ պետական համակարգի ու բոլոր նախարարությունների։ Անգամ կոռուպցիայի դեմ պայքարը տեղի է ունենում ի հեճուկս պետական համակարգի, որովհետև իրավապահ համակարգը անվերջ ձգձգում է գործերի քննությունը։ «Այո՛, եկեք արձանագրենք, որ ամբողջ պետական համակարգը հեղափոխությանը դիմադրում է, և այդ դիմադրությունը ես ջարդելու եմ»,– ասել էր Փաշինյանը։
Պետական համակարգը դիմադրում է հեղափոխությանը. Փաշինյանը պատմեց` ինչ են խոսում իր սենյակում
Լրագրողների հետ զրույցում, պատասխանելով պետական համակարգում ստվերի առկայության մասին հարցին, Աղաջանյանը նշեց, որ ստվերային պայմանավորվածությունների պահով խոսք լինել չի կարող։
«Ես կարծում եմ` վարչապետը նկատի ուներ պետական համակարգի այն ձևը, որը երկար ժամանակ մեզանում գոյություն է ունեցել։ Այն ի սկզբանե եղել է որոշակի տրամաբանությամբ գործող, և այդ մեծ ու ծանր համակարգը նոր տրամաբանության մեջ դնելն ու գործարկելը հեշտ չէ»,- ասաց նա։
Կառավարության նիստից հետո լրագրողների հարցերին պատասխանեց նաև ՀՀ ՊԵԿ նախագահ Դավիթ Անանյանը։ Անդրադառնալով պետական համակարգին ուղղված մեղադրանքներին` Անանյանը նշեց, որ հեղափոխության դիմադրությունը ջարդելու գործընթացին վարչապետի հետ իրենք էլ են մասնակցելու։
«Այդ հայտարարությունը շատ ավելի քաղաքական հայտարարություն էր և կոնկրետ որևէ անձի ուղղված չէր։ Պետական համակարգը ցանկացած երկրում, այդ թվում` ՀՀ–ում, միշտ էլ գնահատվել ու գնահատվում է որպես մի քիչ ավելի կոնֆորմիստ։ Այս առումով պետական համակարգը պահպանողական է ու հեղափոխական քայլերով առաջ գնալու վարքագիծ չի դրսևորում։ Կարծում եմ` վարչապետի խոսքը հենց դրան էր վերաբերում, որ պետական համակարգի հեղափոխական լինելը վերաբերում է նաև պետական համակարգին, և մենք բոլորս պետք է ջանք գործադրենք, որպեսզի կառավարությունը ևս դառնա հեղափոխական»,– ասաց նա։
Անանյանն անդրադարձավ նաև կառավարության նիստում իր և ֆինանսների նախարար Ատոմ Ջանջուղազյանի միջև ի հայտ եկած անհամաձայնություններին։
«Ֆիննախն ո՞վ է, որ գումար տա կամ չտա։ Ֆիննախը չի որոշում` գումար տա, թե չտա, կառավարությունում են որոշում` գումար տալ, թե ոչ»,– ասաց Անանյանը։
Բռնության կոչերի քրեականացումը շփոթեցրեց Փաշինյանին. նա խառնեց Թումանյանին ու Նար–Դոսին
Ինչ վերաբերում է ֆինանսների նախարարի ներկայացրած տեսակետին, ՊԵԿ նախագահը նշեց` դա զուտ տեսակետ էր, որի իրավունքը նախարարությունը, ի դեմս նախարարի, ունի։
Հիշեցնենք` նիստի ընթացքում կրքերը թեժացել էին հատկապես Գյումրու ավտոմաքսատան շինարարության համար գումար հատկացնելու հարցի շուրջ։ Երբ ի սկզբանե նախատեսված 2.2 մլրդ–ի փոխարեն ՊԵԿ–ը 6.2 մլրդ դրամ է պահանջում, ինչն էլ վրդովեցրել էր ֆինանսների նախարարին։
Բանակին բժիշկներ են անհրաժեշտ. նրանք Ամանորը տանը չեն դիմավորի
Թեժ քննարկումների արդյունքում Անանյանը նաև խոստովանել էր, որ թեև ՊԵԿ-ը լրացուցիչ գումարը նոր է ակնկալում ստանալ կառավարությունից, բայց դրա կես արժեքով շինարարությունն արդեն կատարված է, ու ինքը պարտք է մնացել կառուցապատողին։